China-i India arrtsülen sepai tali ayuba atema Pentagon-i merenogo

Washington, May 14 (Agencies): China-i India nunger arrtsülen defence atema alia inyaker aser sepai tali ayur ta shia Pentagon-i, China nunger sepaitem alima tesem balala, talisa Pakistan nung amenokba atema merenogo.
Pentagon-i ‘Military and Security Developments Involving the People’s Republic of China’ indang 2016 report US Congress nem agütsüba sülen osangbenertem senden ka nung jembidang East Asia atema Defence Deputy Assistant Secretary, Abraham M Denmark-i, “India arrtsülen anasa China sepaitem amenokba aser sepai tali ayuba onoki jangjaogo,” ta ashi.
Ajisüaka Denmark-i, ibaji kechi nükjidong nung’ar ashitsü kanga tasak, ta ashi.
China-i Tibet nung par sepaitem akhangshiba dak sentakba tasüngdangba ka langzüdang Denmark-i, “Linük telung nung tashi aittsü atema iba ya kechi jenjang ka nung inyaker (?) mesüra  linük temalen atema koba tashi ka nung inyaker’ar ashitsü tasak,” ta ashi.
Tawa US Defence Secretary, Ashton Carter-i India semdangba dak sentakba nung Denmark-i, pai India semdangba ajanga kanga tajangzük kaogo, ta ashi.
“Onoki India den linük tesentaktep atema maneni inyaktsü, China onük tsütsülen nungi masü saka India ya shilem agir tongtibang ka asübayong lir,” ta paisa ashi.
Defence Department-isa China linüki par sepaitem aliba tesem balala, talisa Pakistan nung amenokba atema merenogo.
“Sino-India arrtsülen mangatettep tesemtem nung maneni tensa mesüngjemteti lir, kong linük anaprong nungi sepaitem lir,” ta pai ashi.
“2015 September ita nung Northern Ladakh, Burtse (China) nung anogo pongu tashi linük ana tsüngda sepaitem raratsüsa tensa liasü, iba sülen India-i senior-level flag-officer senden mena yimjung atema melungtep, aser sepaitem ainshitsü atema linük anapronglai bangjema liasü,” ta parnokisa ashi.