China-i India dang tansütsü lesson ka sayutsüla: Global Times

Beijing/New Delhi, July 05 (Agencies): Sikkim sector kübok Donglong tesem nung India sepaitem tekong kanga merangra China-i India dang tansütsü lesson ka sayutsüla, ta tanü China nunger osangkaket Global Times ajanga ashi.
China-i India nunger sepaitem nema repranger, aser linük ana tsüngda rara adokra India-i 1962 küm rara dang nungi takoksa taliba ajurutsü, ta kasa osang ajanga ashi.
Doklam tesem nung India aser China sepaitem raratsüsa aliba tensa ka nung China nunger mongintem aser media-i rara adokdaktsütsüsa o sadoksadoka jembir.
Iba osangkekaet yimobilem ajangasa, iba onük nung China nunger longjema alitsüla aser mongintemi India anema raratsüla, ta ashi.
“India nunger sepaitemi parnok sasa Doklam nungi mainshira China-i parnok meindoktsü. India nungeri ambangyima inyakba ajanga China nunger jashir. China nunger litsü nungi India nunger sepaitem meindoktsüsa Chinese People’s Liberation Army tashi itta lir ta onoki amanger,” ta yimobilem nungsa shia lir.
“Onoki China nunger dang iba onük nung longjemtsü ayongzüker. Koba tashika China nunger longjemdir yamaji mongintemia India anema raratsü. Tan yabo asenoki India dang tansütsü ka sayutsüla,” ta kasa osang ajanga ashi.
“China nungeri India nunger sepaitem nema repranger. Jaitley-i (India Defence Minister) 2017 India ji 1962 India dang nungi balaka ta jembibaji shitak- India-i rara ayongzükra parnoki 1962 küm dang nungi takoksa taliba ajurutsü,” ta kasa osang ajanga ashi.
Tang China aser India sepaitem Sikkim sector kübok Doklam tesem nung rara adoktsüsa lir. China-ibo iba tesem dang ya Donglong taka ajar.