China-i India den tesendaktepji züngshir: Foreign minister

Beijing/New Delhi, Tsüklai 03 (Agencies): China-i kidanger tajung ka ama India den tesendaktepji züngshir, ajisüaka onoki sovereign temeten aser litsü temeten nungibo masetshitsü, ta tanü Chinese foreign minister, Wang Yi-i metetdaktsü.
China-i Doklam nung atsüanema inyakogo, koba ajanga India den tesendaktep jenjang sayur, ta paisa ashi.
China-i tanga linüktem den tesendaktep ayuba dak sendakba nung Yi-i Chinese International Studies journal nung ocet ka ajanga China-India tesendaktep indang lemsatep, aser iba nungji pai yamai shia lir, “China-i New Delhi den junga inyakba ajanga India nungeri par sepaitem aser osettem Doklam nungi agiena liasü.”
Yaküm June ita nung India aser China sepai tsüngda anogo 73 tashi rara adoktsüsa tensa ka nung liasü, aser iba dak sendakba nung China leniri iba o jembiogo.
Yi-i, “China-i teti agia India den kidanger tajung ka ama tesendaktep yuner, kechyiong kidanger ana ya linük tulu,” ta ashi.
Iba denji külemi China-i sovereign temetentem aser arrtsülen litsü temeten wazüka ayutsü, ta paisa ashi.
Paisa, China-i UN den amalitepa international system nungitttsü aser terenlokdak linüktem den obang ka ser inyaktsü, ta ashi.
“Alima nung yimjung alitsü, alima terenlok ajungketttsütsü aser International temzüng atema khuret aliba linük ka ama onoki maneni inyaktsü,” ta paisa shisem.