China-i India nunger tamang aini aoertem agizüktsü: Luo Zhaohui

New Delhi, Jan. 26 (Agencies): Yashi Congress tongti, Rahul Gandhi-i, pai China semdangba mapang nung China nunger lenirtem ajuruogo, ta ashiba ajanga yaküm Rahul-i Kailash Mansarovar semdangba dak sendakba nung mangatettep adoka aliba mapang ka nung tanü New Delhi nung China ketdangser kati, India nunger tamang ainlen jajartem China-i agizüktsü, ta metetdaktsü.
Rahul Gandhi-i China nungi Minister tem ajuuba dak sendakba nung tasüngdangba ka langzüdang Chinese envoy, Luo Zhaohui-i, “China sorkar, China-i India nungeri tamang ainlen jajartem agizüktsü,” ta metetdaktsü.
Tanep BJP-i, Rahul Gandhi-i China nunger otongdar ama jembir, ta aija liasü.
BJP-isa Rahul dang pai Kailash Mansarovar semdangba mapang nung China nunger minister tem aser ketdangsertem ajuruba osangji tejangja metetdakjang, ta takhangba agutsü.
Osangbenertem den jembidang BJP otongdar, Sambit Patra-i, “Kailash Mansarovar yatra ji tatemtsü ka liasü. Pai item minister tem ajurui ao. Rahul Gandhi ya atamata senso ka masü. Kechiba pai Ministry of External Affairs nem memetetdaktsü? Indian embassy dang kechiba mashi? Pai jembiba otemji onoki tejangja metetner,” ta ashi.
Yashi Odisha nung lokti senden ka nung Rahul-i, yaküm pai Kailash Mansarovar semdangba mapang China nunger minister temi pa dang, China nungbo mapa adokdaktsütsüji tebilemtsü onük ka masü ta shiogo, ta metetdakja liasü.