China-i India telung onüktem nung mejangjongtsüla: Rijiju

New Delhi, April 04 (Agencies): Tibet nunger yimsü lenir, Dalai Lama-i mapang shia Arunachal Pradesh semdangba China linüki ashishiba dak sentakba nung India-i, Tibet nunger yimsü leniri Arunachal semdangba onük nung taila mangatettep madokdaktsütsüla, ta ashi.
Taoba mapangtem nung External affairs ministry-ia, Dalai Lama ya temeshi nisung ka lir, aser India nungeri kanga akhümtsübur, ta shiogo.
Ministry-i sangdong ka ajanga, “Pai tamangba yimsü dak sentakba nung India nung state tesem balala semdangba nung ajemdaker ken o madokdaktsütsüla,” ta ashi.
“India-i ‘one-China’ inyakyim pusemer. China-ia kasaji inyaktsü onoki imlar,” ta Kiren Rijiju-i ashi.
Anungji sorkari, pai Arunachal Pradesh semdangbaji mashishitsü mepishir, ta paisa ashi.
“India-i kodanga China linük telung onüktem nung mejangjonger. China-ia onok telung onüktem nung mejangjongtsü onoki imlar,” ta Rijiju-i ashi.
Home ministry nungi minister-isa, Arunachal Pradesh nungertemi China linük den kiyonger tajung ka ama liner, ta shisem.
Dalai Lama-i Arunachal semdangtsü sentong liasü, ajisüaka tsüngsang mopung majungba ajanga anogo atsülangogo, aser China-i ibaji ashishir.
Tawa Chinese foreign ministry-i India dang, Arunachal Pradesh semdangtsü atema India-i Dalai Lama nem temelaba agutsüba ajanga India aser China tesendaktep raksatsü, ta amokmerena lir.
China-i, Arunachal Pradesh ya Tibet shilem ka lir, ta jembir.