China-i Nepal arrtsülen tentetba border crossing lapoktsür

Beijing, October 15 (Agencies): China-i Nepal arrtsülen tentetba border crossing tanaben lapoktsüba osang ka China’er Foreign Ministry-i tanü Brehostibar nü metetdaktsüogo.

Nepal nung taküm April ita menoknok lendong atalokdang raksaba sülen iba border crossing-ji shibanga liasü ta ministry-i ashi.

Nepal-i latetba linük temzüng tasenba agizüktsü memulungertemi longkak aitba den külemi, India tsütsülen tentetba lenmang ajunga mokdangba ajanga Nepal nüburtemi chiyongtsü aser totzü monguteti tang kanga dang timtema aliba osang bushiteta lir.

Ano, Nepal nung menoknok lendong atalokdang raksaba border crossing anaprongla takaraba mapang nung tanaben lapoktsütsü asoshi Nepal sorkaria China dang mepishia aliba osang jangjaogo.

“China-Nepal Jilong arrtsülen tentetba border crossing tanaben lapoktsüogo aser Nepal nüburtemi nungdakba osettsüset ishika Nepal tonga bener otsüogo,” ta China Foreign Ministry otongdar, Hua Chunying-i tanü ashi.

Ano, lar linüki Nepal nem nungdakba osettsüset maneni agüja yaritsü renemba olen ka lai metetdaktsü.