China-i nübur nem agütsüba temeten anema meinyaktsüla: Guterres

United Nations (UN) Secretary General tasenba akümtsü temeten angusang, Antonio Guterres (Abelen)-i China Tir, Xi Jinping (Achijilen) den Beijing yimtiba kübok Diaoyutai State Guesthouse nung senden amenba noksa nung angur. (Beijing, November 28)

Beijing, November 28 (Agencies): China-i nübur nem agütsüba temeten anema meinyaktsü tajungshiba olen ka United Nations (UN) Secretary General tasenba akümtsü temeten ngua alisang, Antonio Guterres-i tanü, Hombar nü sangoktsüogo.
Guterres-i tanü Beijing yimtiba semdanga, par lenirtem den ajurutepdang iba tajungshiba olenji metetdaktsü.
“Alima tesem aika nung nübur nem agütsüba temeten anema kanga sashia inyaktsü tenzüka lir aser iba amala ozüng alema inyakba maparen nokdangtsü aser nüburtem nem temeten asangsang nung agütsütsü mapatong takok ngua inyaktsü atema NATO-i alizüng yua lir,” ta pai ashi.
China Tir, Xi Jinping-i lenisütsü menden benokba sülen par China sorkari ozüng alema inyakba ken o nung ajemdaker nübur temeten asoshi nokdaker okatsür jenti tepuokdak puoka merenshiba osang bushiteta lir.
Tang UN lenisang menden abensang, Ban Ki-moon-ia taküm 2016 küm July ita China semdangdang par linüki nübur temeten anema meinyaktsü ajungshia liasü.
Nübur nem agütsüba temeten anema inyakba ken o ajemdaker, China aser UN nung züngsemba tentet aser lenirtem na tsüngda mangatettep ken o aiben adoka benshiba osanga bushitetogo.
“Alima tesem balala nung tongpang kanga sashia raraba ajanga takoksa aser tebang agi mejembitettsüsa timtem toushi tulu bener arutsüba mapang nung UN-i yimji yimjung tia bener arutsütsü alizüng yua lir. Nübur nem agütsüba temeten anema inyakba mapang ka nung nüburtem nem yimtenren aser rongsenren temeten tetsükdaktsü kecha meli agütsütsü mapatonga tenzükogo,” ta China Foreign Minister, Wang Yi den aroki osangbener den ajurutepdang Guterres-i sangoktsü.
China-i alima tesem balala nung tensa azüoka, yimji yimjung tia bener arutsütsü mapatong nung tongti shilem agiba atema par linük dang pelaba olen ka taruba 2017 küm January ita 1 nü nungi tenzüka UN lenisang menden abentsü renema alisang, Guterres-i metetdaktsü.
China linüki Iran aser North Korea na den sentakba nuclear mangatettep ken o bentettsütsü mapatong nung tongti shilem agiba den, South Sudan densema, Africa continent nung adokba mangatettepbaren bentettsü merangba aser Middle East nung yimji yimjung bener arutsütsü mapatong nunga tongti shilem agitsü tenzüka lir.