China-i Obama-i Dalai Lama den majuruteptsü amokmerener

Tibet nunger tanülar lenisang, Dalai Lama (Abelen)-i par nüburtem den India kübok Dharmsala nung tentetba Tsuglakhang temple kimalen ajurutepdang agiba noksa ka yangi angur. (File Photo)

 Washington, June 15 (Agencies): US Tir, Barack Obama-i Tibet nunger tanülar lenisang, Dalai Lama den ajurutepa senden mamentsü amokmerenba olen ka China-i metetdaktsüogo.

China mejashidaktsütsü nükjidong nung Obama-i Lama den tangar shinga telungi maitdaktsüi takdang telung nung ajurutepa senden amentsü sentong renemba osang angazükogo.

Obama-i taoba mapanga Tibet nüburtemi tematiba jenjang nung ajungketsang, Lama den ishiben ajurutepa Lama par tembar tajung ka aliba osang metetdakja lir.

Obama-i par linük semdangsang, Lama den 2014 küma ajurutepa Tibet nüburtem indang temeten atema nungdaktsütsü nangzükba sülen China kanga jashidaktsüba osang bushitetogo.

Lama ya Tibet China yimli nungi nüchiso ngua linük tasen ka tentettsütsü meranger ka lir ta züngshia, China-i alima lenirtemi Lama den ajuruteptsü sentongtem nokdangtsü meranger.

“US lenisang, Obama-i Lama den ajurutepa ajanga China anema nokdakba Tibet nüburtem ajungmesoa, parnok temulung olutsütsü aser parnoki China anema taoba mapang nungi tesashiba nokdaktsü tenzüktsü,” ta shia, Obama-i Lama den majuruteptsü asoshi China foreign ministry otongdar, Lu Kang-i amokmerena liasü.

“Obama-i Lama den ajurutepa ajanga China aser US na tsüngda tesendaktepa tamajungba akümtsüa ana nung dang lir,” ta paisa shisem.