China-i Pak nem teyari sen mn 10 agütsütsü nangzüker

 

China-i Pakistan nem teyari sen million 10 agütsütsü tezüngzüktep ka China’er Pakistan ambassador, Sun Wiedong (Achjilen) aser Pakistan’er Economic Affairs Division nung secretary, Muhammad Saleem Sethi nati tanü Islamabad yimti nung zülutepa agiba sülen teka amtepa salemba noksa nung angur. (Islamabad, July 15)

 

Beijing, July 15 (Agencies): China sorkari Pakistan nem teyari sen million 10 tashi agütsütsü tezüngzüktep ka tanü Bodbar nü agiogo.

Pakistan kübok densemba tribal tesemtem nung mitkartemi telungpur aser kiralongrar mita parnok den tongpang raraba ajanga pei talidak toktsür tanga tesemtem nung jenoka alitsüsa akümertem nem nungdakba teyari agütsüdaktsütsü nükjidong nung China-i teyari senji agütsütsü nangzüker lir.

China-i Pakistan nem teyari sen million 10 agütsütsü tezüngzüktepji China’er Pakistan ambassador, Sun Wiedong aser Pakistan’er Economic Affairs Division nung secretary, Muhammad Saleem Sethi nati tanü Islamabad yimti nung zülutepa agi.

“Pakistan-i par linük kümzüka ayutsü den sentakba maparen inyakba ajunga nungitsü asoshi China-i renema lir. Ano, Pakistan kübok Federally Administered Tribal Areas (FATA) nung terenelok lidakja idakji alirtem taküm jenjang tajungba küma temalen ajungkettsütsü asoshi nungdakba teyari agütsütsü atema China-i renemogo,” ta Weidong-i tanü metetdaktsü.

Pakistan mitkartemi tribal area-tem nung kiralongrartem den tongpang raraba ajanga timtem toushi jenti bener arutsüba nüburtem yaritsü maparen nung China-i tan agütsütsü nangzükba senji amshitsü ta Pakistan finance ministry-ia tanü metetdaktsü.

Pakistan mitkartemi yaküm 2014 küm June ita nungi tenzüka North Waziristan nung tentetba Taliban telok mita parnok makdoktsü tenzükba sülen iba tesem nung alir nisung million ka dak temai pei talidak toktsür tanga tesemtem nung jenoka alitsüsa akümba osang bushiteta lir.

Pakistan mitkartemi tanü tashi nung North Waziristan lushi shilem noklang nung shilem 90 tashi nungi telungpur aser kiralongrartem takok ngua makdokba osanga bushiteta lir.

Yaküm 2014 küma China sorkari pei talidak toktsür tanga tesemtem nung jenoka aliba Pakistan nüburtem yaritsü asoshi sen million 10 tashi agüja liasü.

China Tir, Xi Jingping-ia yaküm April ita Pakistan semdanga China-Pakistan Economic Corridor yanglutsü asoshi dollar sen billion 46 tashi agütsütsü tenangzükba ka metetdakja liasü.