China-i Pakistan nem ‘maritime patrol’ rong tasembuba tongtsüogo

Beijing, April 15 (Agencies) : China-i Pakistan nem patrol rong 600-tonne, tasembuba Linük indang tzü nung inyakyimtem kümzüka ayutsü asoshi iba rong tongtsür.
China Shipbuilding Trading Company Ltd (CSTC) aser China State Shipbuilding Corporation (CSSC) Xijiang Shipbuilding Co Ltd nung yangluba rong ya Guangdong province kübok Guangzhou nung agütsütep.
Tesüiba mapang agütsüba rong ana jagi inyakyim ajunga nung kanga junga teyari agütsür aser balakata lokteper exercise agiba mapang mesüra tzü lendong nung tekümzüker mapa kanga tashi ita inyaktetba agi iba rong dak temulung kanga alemer, ta Pakistan osangkaket nung shia lir.
Pakistan maritime authority-i item rong ajungba atema aser China nung rong yanglurtemi parnok den angatettepa inyakba asoshi kanga pelaba metetdaktsü. Rong ayokba sülen ano China-i yanglushiba mapa nung yaritsü nangzüka lir.
Item rongtem ajanga China-Pakistan Economic Corridor (CPEC) tali tashi itshir aser linük ana tsüngda tesendaktep akangshir, ta kasa osangkaket nung shia lir.
CPEC project ajanga Pakistan kübok Gwadar yimti aser China nung Xinjiang yimti na tsüngda gari lenmang aser train lenmangtem agi sendakteptsü. Iba project ya 2015 küm sen US dollar million 46 agi tenzük ajisüaka khen lir ano sen US dollar million 55 küma yanglushi.