China-i Pakistan nung par lisopur dang kümdanga alitsü ashir

Islamabad, December 08 (Agencies): Tarutsü nung tesendaktep tamajungba kümdaktsütsüsa, China-i Pakistan nung par lisopur dang kiralongrar temi lendong agütsütsü südi, ta ashi.
Kiralongrar nungi kümzüktsü mechi Pakistan nung China lisopur aser lokti tentet balala dang kümdanga alitsü asoshi Islamabad nung aliba Embassy of China-i tekümdangtsü metetdaktsü.
Pakistan nung aliba China nunger aser lokti balala dak kiralongrartemi mapang talangka melie kanga sashia amaktsü tasa yanglur südi, ta Chinese Embassy ajanga ashiba osang ka South China Morning Post nung adoktsü.
“Pakistan nung aliba China nunger lokti aser lisopurtem ajunga dang embassy ajanga kümdanga alitsü, pei taküm kümzüka alitsü, kima nung mapang indokba ajemtsü aser akok tashi nisung aika aliba tesem nung malitsü metetdaktsü,” ta sangdong ajanga ashi.
Pakistan nung tang China nunger nisung 400,000 telidak lir aser parnok ya timba China-Pakistan Economic Corridor (CPEC) nung mapa inyakertem lir, ta ashir.
Embassy ajangasa China nunger dang Pakistan police aser mitkartem den tesendaktep junga alitsü ajungshi.
Linük ana tsüngta tesendaktep tamajungba akümba mapang ka lir.
CPEC nung shilem ka ama Pakistan nung lenmang tulu asem yangluba nung China-i senotsü teyari agütsüba anena lir.
Ochimashi mapa inyakba ajanga senotsü teyari ya nokdangtsü asoshi telemtetba agi aser iba ajanga Pakistan ketdangsertem kanga aoksatep.
CPEC ya sen billion $60 jungnüa agi yanglutsü sentong lira ser iba flagship project ya China indang One Belt One Road sentong nung densema lir. Iba lenmang ya Pakistan-occupied Kashmir (PoK) ajanga aor aser iba lenmang ajanga China indang Xinjiang region aser Pakistan indang Balochistan province sendakteptsü.