China-i Pokemon Go aser yamala mesükba asayatem nokdanger

Hong Kong, January 10(Agencies): Nintendo indang smart phone app, Pokemon Go aser yamala asayatem China nung tang tashibo arua mali, saka yamala tashishitsü aketba asaya jungjunga masadang tashi China nung asayatsü asoshi temalaba magütsütsü, kechiyong ibala asaya ajanga neburtem nem lendong bener arutsütsü akok ta osang ajanga sangdong.
US nung amenoker aliba alima nung tulutiba smartphone aser online asaya shishilembaba telok Niantic-i yaküm iba asaya sayaba sülen alima ajunga nung kanga nüngtuku aküm.
Iba asaya nung asayartemi parnok indang smartphone screen nung Pokemon nung adokba cartoon noksatem aputsü/tangoktsü asoshi tesem balala sema senzütsüla.
Iba asaya nung temolung agütsüdang gari aika tsükokogo, item rongnung karbo kanga mejungi tsükok, maneni iba asaya nung linük tesemtem ajak nung Pokemon tem bushia senzür koba Google map den sendakteba lir, anungji iba ya National security asoshi tebilemtsü lir. Iba ajanga mangatettep adoker.
National security, nisung taküm aser osettsüset dak sendakba tebilemtsü nung ajemdaker State Administration of Press, Publication, Radio, Film aser Television temi tanga government department tem den külemi iba asaya dak sendaka aliba lendongtem asadangdar, ta industry telok kati ashi.
Iba asaya nung lendongtemji, “gari senzüsenpongba nung lendongtem, asayartem pei taküm kümzüka ayutsü asoshi tebilemtsü aser national security asoshi tebilemtsütem lir,” ta China Audio-video aser Digital Publishing Association-i parnok indang website nung agutsü.
Iba asaya ya Google company indang Maps application amala teyari agia asayar koba China nung nokdanga lir.
Niantic nung inyakertem dang iba onük nung parnok tebilemba email ajanga asüngdang saka telangzüba kecha magütsü.