China-i pua aliba drone meyiptsütsü lemtetogo:US

Washington, December 18 (Agencies) : Taoba hopta tetenzüklen China-i international tzü nung US meyong tzü telung nung jajaba drone ka pua aliba meyiptsütsü mulungogo, ta Pentagon sangdong ka ajanga metetdaktsü.
“China-i ozüng alema US indang tzü telung nung jajaba international drone ka South China Sea nung apuba anema shidi ka züluogo. China nunger bangdakpurtem den chitepa jembishinüba mapang China nungeri pua aliba UUV United States nem meyiptsütsü atema tangatettep kati arua bangjemogo,” ta Pentagon otongdar Peter Cook-i sangdong ka ajanga metetdaktsü.
Iba drone ya kong aser kechi yimya nung meyiptsütsüar ano osang tejangja memetetdaktsü.
Iba ya masüdang China defence ministry-i, onoki drone meyiptsütsü lemtetogo, ajisüaka US-i iba tatalokba tali shisangdaktsüba onoki aitsür. US Tir asoshi shimteter alisang, Donald Trump-i iba tatalokba tali shisangdaktsür, ta ashi.
Donald Trump-i, “China dang parnoki auyaba drone ji onok menüngdak aser aji parnok yuang ta ashitsüla,” ta tweet asü.
“Iba drone ya US indanga ta jangjaba sülen China-i inyakyim shitak ajanga US nem meyiptsütsü lemtet,” ta China Defense Ministry nung otongdar Sr. Col. Yang Yujun-i ashi.
“China aser US na iba tatalokba atema tongtepratep yonga arur. Anungji US-i iba tatalokba tali shisangdaktsübaji tim masü aser sasa bilemer,” ta paisa ashi.
US-i mapang shia parnok indang rong aser tayimtsütem China tsütsü aliba tzü-i yoka military surveys agir. China-i iba ama inyakyim ajang ajanga aitsür aser US dang iba ama inyakyim anentsü akhanger. US-i iba ama inyak dang China-i kanga junga mita atatsü aser parnok nokdangtsü atema akokba tashi agi inyakteptsü,” ta kasa sangdong nung shia lir.