China-i SCS ken o tamajungba mekümdaktsütsü ajungshir: Turnbull

Sydney, February 19 (Agencies): China-i South China Sea (SCS) ken o tamajungba mekümdaktsütsü tajungshiba olen ka Australia aser New Zealand nati tanü, Hokolbar nü metetdaktsüogo.

China-i mangatettep adokba SCS tzüyim kübok Paracel Island nung densemba Woody Island nung tongpang nung amshitsü advanced surface-to-air missile system yutsüba osang yashi, Brehostibar nü jangjashitsüba sülen Australia o N Zealand linük nati tanü iba olenji metetdaktsür lir.

China aser kidangsüa aliba Vietnam, Malaysia, Brunei, Philippines aser Taiwan linüktem rong nung SCS ken o ya kanga sashia adoka lir.

“China densema, SCS mangatettep ken o benoka alir linük ajungai mangatettep adokba tzüyim tesemtem nung asetkong tentettsü, mitkar tesep tentettsü aser ali mekazüka ayutsü maparen inyaka SCS ken o tamajungba mekümdaktsütsü ajungshir,” ta Australia Ato Kilonser, Malcolm Turnbull-i N Zealand Ato Kilonser, John Key den Sydney nung senden ka amenba sülen metetdaktsü.

China Tir, Xi Jinping-i tang adoka aliba SCS mangatettep ken o ajunga tongpang raraba ajanga masü saka yimjung sentongtem ajanga bentettsü tajungshiba olen ka Turnbill-isa metetdaktsü.

Turnbill-i taküm April ita Beijing semdangtsü sentong renema aliba osanga angazükogo.

China-i mangatettep adokba SCS tzüyim nung tensa tajungba kümdaktsütsü tajungshiba olen ka Key-ia tanü metetdaktsü.

“Ozü N Zealand linüki China den shishilembatsü densema, tongti tezüngzüktep aika agia ozü linük ana tsüngda tesendaktep junga yanglutsü tenzüka lir. Ano, ozü linük aser Australia naprongla tawa tentetba Asian Investment Bank nunga züngsema lir. Anungji, China-i SCS ken o bentetba ajanga asenok ajungai tajangzük angutsü imlar,” ta Key-i ashi.

Australia Foreign Minister, Julie Bishop-ia tawa Beijing semdanga China lenirtem den SCS den sentakba onüktem benoka jembiba osang jangjaogo.