China-i South China Sea asetkong nung Park yanglutsü

Beijing, October 3 (Agencies) : China-i Hainan asetkong nung ocean park ka yanglutsü. Iba asetkong ya tang mangatettep adoker aliba South China Sea nung lir.
China anülulentip tsütsü aliba Hainan asetkong nung iba marine park ya yanglutsü.
Tan iba park yangluba sülen China nung ibala mesükba parnk 42 akümtsü, ta linük sangdong ka ajanga metetdaktsü.
Zhuhai nung aliba Chimelong Ocean Kingdom park mesükba, item park tem ya raliwalirtem amongba tesem tajung ka ka kümogo aser park tem nung polar bears aser giant sharks tem den tesüngmangtsü shirurutem aika yua lir.
Item shiruru rongnung samaa taoer aliba beluga whales tema dena lir.
China nung iba industry ya kanga takok ngua odar, ajisüaka shiruru atema inyakertemi shiruru shibanga ayuba tebilemtsü lemsatepogo.
State Oceanic Administration (SOA)-i iba province nung aliba marine ketdangsertem dang iba park atema tesem lungteta ayutsü aser aji memelenshii ayutsü ozüng agütsüogo, ta Hombarnü China official media ajanga metetdaktsü.
Item park tem ya Hainan nung dang masü ano Liaoning, Shandong, Fujian aser Guangdong province tem nunga yanglutsü.
Science asetkong, Hainan ya China anülulentip tsütsü lir aser China Sea mangatettepji iba tzü nungi tenzüka lir.
Beijing-i South China Sea noklang nung shilem 80 parnok meyong ta ashir. Iba tzü ya waterways atema kanga tongtibang tesem ka aser totzü barrel billion 7 tashi agitettettsüsa lir.
Aji oda süaka July ita nung international court kati Philippines pusema China-i ashibaji aitsüogo. Iba tzü ya Taiwan, Vietnam, Brunei aser Malaysia linüktemi raktepdar.