China-i South Korea missionary aika mendok

Seoul, March 10, 2017 (Agencies) : China-i Jilin province nungi South Korea missionary 30 nugi 70 shi ka meindokogo, ta osang ajanga metetdaktsü.
“China ketdangsertemi missionary tem ki mita ao aser parnok indang visa nung timtem kar lir ta shia linük toktsür aotsü tuyu” ta human rights activist & pastor kati osangbener dang ashi.
Missionary teimbaka tourist mesüra student visa bena liasü. china-i meindoba Korea nunger karbo North Korea refugee tem den yaritepertem liasü aser refugee tem rongnung parnok 40 tashi par linüki meyipa yokogo, ta Pastor Kim Hee-Tae-ia ashi.
“Tesüiba mapang missionary tem nem ita ka agütsü, saka tangbo mapang tera danga magütsü” ta Pastor Kim-isa ashi.
China sorkari South Korea missionary tem meindokba atema kuli kecha magütsü, saka Khristantem nem tenokdangba kar agütsüba atema iba mapa inyakba asütsü ta nisungtemi bilemer.
Maneni South Korea-i U.S. THAAD maparen tajungba kümdaktsütsü atema inyakba China-i magizükba ajanga iba ya inyaker asütsü ta akok ta nisung kari ashir.
China nung South Korean missionary 500 shi ‘officially register’ süa lir ta osang angazüker.
Parnok teimbaka North Korea den arrtsüa aliba tesemtem nung North Korea nungi jena arurtem den yariteper.
Ajisüaka, iba tesem nung mapa inyakba nung lendong tulu keta lir. 2016 küm Korean-Chinese pastor ka arrtsü anasa sür lia angu aser 2015 küm South Korean pastor ka pur oa tepsetba atema America nung okadak kati North Korea dang asür kibong nem $330 million agüjang ta tetuyuba agütsü.