China-i tanaben bena arutetba satellite anünglaki kaketa yok

Beijing, April 06 (Agencies): China-i tanaben bena arutetba research satellite ka anünglaki tanü, Bodbar nü takok ngua kaketa yokogo.
Anünglak micro-gravity aser space life science den sentakba osangtsüsang aser tetendangbaren agitsü nükjidong nung China-i par SJ-10 satellite-ji anünglaki kaketa yoker lir.
China northwest tsütsülen Gobi desert nung tentetba Jiuquan Satellite Lauch Centre nungi Long March 2-D rocket tashi amshia, SJ-10 satellite-ji tanü kaketa yoka liasü.
Anünglak tonga atuba sülen prangpong injang mesükba satellite-i microgravity fluid physics, micorgravity combustion, space material, space radiation effect, microgravity biological effect aser space bio-technology densema tetendangba 19 tashi agitsü aser tesülen satellite-i tanaben alimai meyipa alutsü ta China sorkari ketdang asüba Xinhua osangi metetdaktsü.
Ano, meimchiri anünglak soyapokyatsü den sentakba bushisüngdang agitsü atema koya shiruru anünglak tendangtsü renemba osanga angazükogo.
“Tan anünglaki kaketa yokba SJ-10 satellite-i agitsü aliba bushisüngdang aser osangtsüsang agitsü mapatong ajungaji tan asena agitsü renemer lir,” ta SJ-10 satellite kaketa yoker scientist telok lenisang,  Hu Wenrui-ia metetdaktsü.
SJ-10 satellite-ji China-i küm 10 shi tsüngda nung tanaben bena arutetba satellite 25 buba anünglaki takok ngua kaketa yoker lir.
Tan kaketa yokba satellite-i bushisüngdangtsüren tembanga agiba sülen alimai tanaben meyipa alua, Inner Mongolia kübok Siziwang Banner nung anenzükdaktsütsü sentong renemba osanga jangjaogo.