Beijing, March 01 (Agencies): China aser Vietnam nati sako alizüng yua lir ta shia, China Tir, Xi Jinping-i par China aser Vietnam linük na tanaben sentaktepshidaktsütsü jangraba olen ka tanü, Mongolbar nü metetdaktsüogo.
Vietnam nung tentetba Communist Party yimtenren telok lenisang, Nguyen Phu Trong’er special envoy, Hoang Binh Quan den ajurutepa senden ka amendang Xi-i iba olenji lemsatepa liasü.
South China Sea (SCS) den sentakba mangatettep ken o adokba ajanga par linük ana tsüngda tesendaktep mejungi akümbaren tanaben tajungba küma yanglushitsü jangraba olen ka Xi-isa metetdaktsü.
China-i tashishitsü ken o adokdak, SCS nung, Vietnam’er tzüyimkümlen totzü tutetdak ka 2014 küm tentetba sülen Vietnam nung alirtemi China anema kanga sashia longkak aita par linük ana tsüngda tesendaktep mejungi akümtsü tenzük.
Iba mapang nungi tenzüka, Xi-i yaküm 2015 küm Hanoi semdangba densema, par communist linük ana tsüngda tesendaktep tajungba kümdaktsütsü nükjidong nung linük ana nungi lenirtemi aiben ajurutepa senden balala amenba osang bushiteta lir.
“China aser Vietnam linük na indang alizüng sako lir. Kasa alizüngji China nung tentetba Communist Party aser Vietnam nung tentetba Communist Party natia yua lir. Asen linük ana tsüngda tanaben sentaktepshia tesendaktep junga yanglushiba ajanga asen linük anaprongla den asen nübur ajunga nem tajangzük tulu bener arutsütsü imlar,” ta Xi-i metetdaktsü.
China yimli kübok aitba Paracel archipelago nung densemba Woody Islands nung China-i par tongpang nung amshitsü surface-to-air missile ishika amenokba osang ka Taiwan aser US ketdangsertemi taoba February ita alima dang sangoktsüba sülen China aser Vietnam na tsüngda tesendaktep taoba mapang nungi tamajungba akümtsü tenzüka lir.
You must be logged in to post a comment Login