China indang jet Miyako Strait yimdangba ngua Japan-i raraba jet yok

Tokyo, November 27 (Agencies) : China air force indang tayimtsü kar Okinawa prefecture kübok Miyako Strait ajanga yimdanga aoba sülen Japan-i parnok meyong raradang amshiba jet yok, ta Defence Ministry sangdong ka ajanga metetdaktsü. China nunger tayimtsü trok – raradang amshiba jet ana dena – Okinawa asetkong tiyong aser Miyako asetkong tsüngda aliba Miyako Strait yimdanga ao, ta ministry sangdong ajanga metetdaktsüba Honibarnü ABS-CBN osang ajanga metetdaktsü.
Aji oda süaka, Japan nunger tayimtsü jajaba tesem nung timtem agütsütsüsabo mait, ta osang ajangasa ashi.
September ita nunga iba mesükba tatalokba ka ataloka liasü. Iba mapang China nunger tayimtsü 8 tashi (raradang amshiba jet tem dena) kasa tesem yimdanga ao aser ibaji ajanga defence ministry-i tan inyakba kasa inyaka liasü. China nunger tayimtsü linük ajanga iba yimya nung yimdanga aobaji ibaji mezüng liasü.
Japan Defence Ministry nung Joint Staff Office ajanga ashiba agi, tayimtsü pezü, H-6 bomber aser intelligence-gathering aircraft tem dena, Pacific Ocean tekadang China anüdoklen aliba tzüyimleni Miyako Strait ajanga yimdanga ao.
Miyako Strait ajanga ayimba fighter jet Su-30 anaji tayimtsü tanga pezü den meyipa oa ajurutepba sülen China anodoklen tzüyimleni yimya ao, ta ministry sangdong nungjisa shia lir.