China-India arrtsülen tensa mejungi lia Modi-i Xi ajuru

July 07, 2017 nü Germany, Hamburg yimti nung 12buba G20 senden nung Ato kilonser, Narendra Modi den BRICS linüktem nungi lenirtem jurila senden ka amenba noksa nung angur. 

Hamburg/New Delhi, July 07 (TYO): Tang China aser India arrtsülen tensa mejungi lia tanü BRICS lenirtem senden nung Ato kilonser, Narendra Modi aser China Tir, Xi Jinping na ajurutepa salemba sülen sensaksema liasü.
Germany, Hamburg nung G20 Summit tanü tenzükogo, aser iba senden alidang jurila senden ka nung China aser India lenir na ajurutep.
Twitter ajanga External affairs ministry otongdar, Gopal Baglay-i, Modi aser Xi nati onük aika nung o lemtepogo, ta metetdaktsü.
Gopal-i, “China-i ketdangsüa BRICS lenirtem senden nung @ Hamburg Ato kilonser @narendramodi aser Tir, Xi na onük aika nung o lemtepogo,” ta metetdaktsü.
Ministry-isa Modi aser Xi na ajurua salemba noksa ka lemsatep.
Osang angazükba agi, tanü Modi-i Xi dang India-i China linük den amalitepa inyaktsü ta nangzükogo.
Kiralongra onük nung jembidang China Tir, Xi-i, India-i kiralongra anema inyaktsü temelungtetba tulu aser rongsenkettsüng nung ainba atema tenüngsang agütsü.
Yashi China nung tongti ketdangser kati, G20 senden mapang nung Modi aser Xi na ajuruteptsü atema tensai memelar, ta sangdonga liasü, ajisüaka tanü tena ajuruogo.
Brihostibarnü China Foreign Ministry nungi otongdar kati, “Tir Xi aser Ato kilonser Modi na senden amentsüsa tensa ka masü,” ta metetdakja liasü.
China nunger Army temi mangatettep aliba tesem nung gari lenmang ka yangluba India sepaitemi nokdanga liasü, aser iba mapang nungjagi tenzüka Bhutan anasa aliba Dokalam tesem nung linük ana sepaitem tesüiba anogo 20 tashi rara adoktsüsa tensa ka nung lia tanü Modi aser Xi na ajurutepogo.
BRICS bloc nung ya Brazil, Russia, India, China aser South Africa linüktem lir.
Ano G20 züngsem linüktem nung India aser China linük nata densema lir.