China, Japan & S Korea lenirtemi tongti regional senden amener

Tokyo, August 24 (Agencies): Japan, South Korea aser China nungi foreign minister-temi Japan yimtiba, Tokyo nung tanü, Bodbar nü  nungi tenzüka tongti regional senden ka amen tenzükogo.
Japan Foreign Minister, Fumio Kishida; China Foreign Minister, Wang Yia aser S Korea Foreign Minister, Yun Byung-Se nungeri tan senden nung par region nung adokba alimang den sentakba mangatettepbaren, US missile defense system aser North Korea nunger den sentakba onüktem tongtipangsüa benoka jembiba osang angazükogo.
Japan-i Senkaku aser China-i Diaoyu ta ajaba South China Sea (SCS) tzüyim nung densemba asetkong den sentakba nung Japan aser China na tsüngda mangatettep ken o tulu adoka lir.
Ano, N Korea-i kaloktsüba missile-tem anüng nungi kazüka yoktsü nükjidong nung S Korea-i THAAD ta ajaba US nung yangluba missile system par linük amenoktsü sentong renemba atema mepelaba olen ka China-i metetdakja lir.
S Korea nung THAAD amenba ajanga par region nung US nem tashi tali agütsütsü aser China-i northeast Asia nung par mitkar mapatong inyakba ajunga tendangtettsü ta shia, China-i THAAD amenoktsü renemba atema tebilemtsü akaba olen metetdaktsüogo.
N Korea-i United Nations (US) telemtetba anema inyaka, tongpang nung amshitsü nuclear osettsüset aser missile-tem yanglua kasaji tendanga kadokba atema kidangsüa alir Japan, S Korea aser China linüktemi tebilemtsü khuret benoka lir aser tan senden nung shilem agir lenirtemi Pyongyang’er nuclear mapatong anentsütsü asoshi tasa aser lenmangtem bushitsü alizüng yua lir.