China ketdangsertemi Evangelical Tenla ki bomb agi poksatsü

Aenjeti (January) 12, 2018: China north tsütsülen mapang ka nungbo Khristan 50,000 dak tema atema tekülem agiba Tenla ki ka joko auyi küma poksatsüogo.
Shanxi province kübok Linfen yimti nung aliba Golden Lampstand Church indang kilem aser Kangki ji tangbo tenlaki chirepba jana tema nung lir.
Tan hopta tetenzüklen China ketdangsertemi iba Tenla ki telung nung aliba tekülem ki (underground worship hall) nung bomb tesashi yutsür pokdaktsü, ta US nung amenoka aliba Christian advocacy group, ChinaAid osang ajanga metetdaktsü.
China sorkar ketdangsertem aser Golden Lampstand Church na tsüngda timtem adokba ya tang mezüng masü, saka tamalena aiben ataloka lir.
2009 küm iba Tenla ki yangludang police aser ketdangser 400-i Arogo züngsemtem anema inyakba den külemi building raksatsü aser Laishiba rakzüka yua liasü.
Iba mapang nung Pastor aser par kinüngertem densema Arogo lenirtem aika apu. Parnoki aluyimba li rakzüka agi, iba den külemi lokti tulu adenshiba ajanga ‘traffic’ tetuyuba nung timtem agütsür, ta aija parnok apu.
Iba Arogo tentetsang, Evangelist Yang Xuan küm asem ser ita trok tepoukdak ayu aser pa kinüngtsü, Yang Caizhen küm ana re-education labor camp nung ayu.
Evangelist Yang’er jalai tawa Tenla ki raksatsüba kulitemji metetdaktsüogo.
Yang’er jala, Yang Rongli-i, “Police-i Golden Lampstand Church ji longbanga nokdak aser Patrol wagons-i Tenla kiji anük. Mapa inyakertemi Tenla kidang aliba aina jaksatsü. Iba mapang nung parnoki excavators amshia Tenla kiji atu, ajisüaka onok telungi aitsü memela, mesüra ibaji reparanga atatsü memela. Yimdak tekolakba aser local police station nung police-i tamangertem Tenla ki telungi maitsü amokmeren. Joko kechi ataloktsüar onoki memetet,” ta ChinaAid osangbener ka dang ashi.
Tang China nung Khristan nütsüng million 60 shi lir, ajisüaka nütsüng arenbaji ajanga sorkari Khristantem reshikangshir.
“Golden Lampstand Church züngsemtem tanen makai reshikangshiba ajanga, China sorkari tamangba yimsü sadoka amangtsü tangatetba mesüra meimchir temeten anema inyakba kuli sayur,” ta ChinaAid tenzüksang aser Tir, Bob Fu-i ashi.
“Iba ama Tenla ki poksatsüba atema alima linüktemi yimjak nung aitsütsü asoshi ChinaAid-i ayongzüker, iba den külemi China sorkar dang Khristantem rongsen agi yangluba Tenla ki raksatsüba atema temenok peria agütsütsütsü akhanger,” ta paisa metetdaktsü.