China: Kisüjensü lendong nung nisung 70 shi asü

China anüdoklen, Jiangxi province kübok Fengcheng nung teyangludak power plant yanglutsü atema amshiba sabang ka jirepa, lendong atalokba sülen rescue ketdangsertemi lendong atalokdak nisung kümzüktsü mapa inyakba noksa nung angur. (Beijing, November 24)

Beijing, November 24 (Agencies): China anüdoklen tesüdak power plant ki ka yanglutsü atema amshiba sabang ka jirepa, tanep, Brehostibar anepdang lendong kanga sashia atalokba osang ka sorkar ketdangsertemi metetdaktsüogo.
Tan lendong nung ishiba agi kisür nisung 70 asüba aser mapa inyaker nisung 1 anaenbangba osang ka China sorkari ketdang asüba Xinhua osangi metetdaktsü.
“Jiangxi province kübok Fengcheng nung tanep 7:00 ako meta lendong atalokba sülen nisung 70 shi asüba, nisung 1 anenbangba aser nisung 2 yiruba osang tang tashi nung jangjaogo. Tanep yirur anaji tang mozükidang anepalua aliba aser rescue ketdangsertemi anenbanga alisangji kümzüka anitettsü merangba osang angazükogo,” ta osangi shisem.
Tan lendongji kechi timtem ajanga atalok iba osang jangjatsü atema bushisüngdang sentong agitsü aser aibelener nem tapet temerenshi agütsütsü tetuyuba ka China Ato Kilonser, Li Keqiang-ia agütsüogo.
“Tarutsü anogotem nung tan amala lendong tanaben mataloktsüsa, inyakyim ajunga tali kümdangshia inyaktsüla,” ta Li-i sangoktsü.
Nungdakba osettsüset tajung mamshiba ajanga China’er industrial tesemtem nung tan amala lendong mapang shia atalokba osang bushiteta lir.
Taoba 2015 küma China tzüyimkümlen tentetba Tiajin yimti nung chemical oset apokba lendong ka ataloka, nisung 170 dak tema poksetba osang jangjaogo.
“Azü tokshiba ajanga dang ketdangsertemi tansütsü tajung ngua, tali kümdangshitsü,” ta idanjia, China Tir, Xi Jinping-i sangokja liasü.