China mi lendong nung nisung 10 rongset, 14 yiru

February 25, 2017 nü Nanchang, Jiangxi province nung HNA Hotel tamentep anabuba nung mi adokdang mi den raratemi mi remsepba nung yariba noksa yangi angur.

Beijing, February 25 (Agencies) : Honibarnü China eastern Jiangxi Province yimtiba Nanchang nung takdang aika aliba hotel tajung ka nung mi tesashi adoka nisung 10 rongset aser nisung 14 yiru.
Mi den raratemi ki ronger aliba nungi nisung tasümang tenet agitet aser yirur alir nisung 16 mozü kidangi bener aoba rongnung parnok asem mekümzükteti asü, ta china osangkakettem nung metetdaktsü.
Honggutan New District nung aliba Platinum Mix Hotel tamentep tanabuba nungi miji adok, ta mi den rarartemi ashi.
Mi adokba mapang iba ki tamentep tanabuba nungji ki sobutsü project inyaker nisung 10 tashi mapa inyaka liasü, ta iba lendong nungi jebuba tetsür kati ashi.
Iba ki tamentep pezü hotel ya ki tamentep 24 apartment ka den sendaktepa lir aser iba apartmenet tem nung alir nisung 260 tashi pei takdang nungi ainshiogo.
Iba lendong dak sendakba nung police-i nisung aika pua lir.
“Iba miji ki sobutsü inokertemi oset rangsaba mapang adokdaktsü ta mezüng bushisüngdang mapang puteta lir. Ano maneni bushisüngdang südar,” ta osang ajanga metetdaktsü.