China: Mijang tutetdak mi lendong atalok; 21 asü

Beijing, November 21 (Agencies): China northeast tsütsü Heilongjiang province nung tentetba mijang tutetdak mi lendong ataloka ishiba agi nisung 21 asüba aser nisung 1 samaba osang tang tashi nung jangjaogo ta sorkar ketdangsertemi metetdaktsüogo.

Yasüng, Hokolbar anonung Jixi yimti anasa tentetba Xinghua mijang tutetdak adokba miji tanü Honibar nü tashi nung remseptsütetba osang jangjaogo ta sorkari ketdang asüba Xinhua News Agency-ia metetdaktsü.

“Tanü tashi nung tasümang 21 tashi mijang tutetdak nungi agitetba aser nisung 1 samar bushiba osang jangjaogo,” ta mijang tutetdak kibur, Heilongjiang Longmay Mining Holding Group-i osang jangjashitsü.

Mijang tutetter nisung 38 tashi mijiang tutetdak telung nung yasüng mapa inyaka alidang mi lendongji adokba osang jangjaogo ta Xinhua osangi ashi.

Mi lendongji adokba sülen mijang tutetter nisung 16 tashi kümzüka anitet saka tanüngba nisung 21-ji mekümzükteti mijang tutetdak telung nung asü ta osangi shisem.

Ajisüaka, kechi timtem ajanga yasüng mi lendongji adok iba osang tang tashi mejangjateti lir.

Taküm 2015 April ita nungi tenzüka tanü tashi nung tan atalokba lendong ya mijang tutetdak mi lendong tesashiba ataloker lir.