China Minister, Meng Interpol lenisang shimogo

Bali, November 10 (Agencies): Alima ajunga nung teloktep police tentet tongtiba, International Criminal Police Organization (Interpol) Tir menden abentsü atema China’er Vice Public Security Minister, Meng Hongwei tanü, Brehostibar nü shimogo.
Indonesia kübok Bali nung agiba Interpol’er General Assembly senden nung Meng Interpol lenisang asütsü atema shima liasü aser Meng ya iba tongti menden abentsü temeten angur mezüngbuba China yimsüsür akümer lir.
Ajisüaka, Meng shimba sülen alima jenjang nung nübur temeten atema nokdakba tentettemi pa shimba anemtsü tenzüka lir.
China nung temzüng ozüng junga mebenshiba aser par police tashi amshia, China anemer yimsüsür aser yimtenren telok anema, par mapatong ajunga nokdangba ken o nung ajemdaker China nem Interpol lenisang menden abentsü temeten magütsütsü takhangba longkak aitertemi benoktsü tenzükogo.
France nung tesepti tentetba Interpol nung alima linük 190 tashi züngsema lir aser iba tentet nem ozüng alema inyaker aputsü aser parnok aibelendak linüktemi anir oa merenshitsü tetuyuba agütsütsü temeten aser tashi agüja lir.
Interpol-i linük ka indang kibok yimtenren, miktar, tamangba yimsü aser kin kidong den sentakba ken o nung teka amoka shilem magitsü lateta lir saka Russia aser Iran na densema, Interpol nung züngsemba linük kari Interpol tashi amshia, par sorkar anemer pua merenshitsü maparen kanga sashia inyakba osang bushiteta lir.
“Alima ajunga nung tesüiba mapang, World War II tongpang raraba sülen tan timtem aser tebilemtsü khuret tesashitiba ajurutsü tenzükba mapang ka nung ni Interpol lenisütsü menden abentsü maongka angur lir,” ta Meng-ia pa Interpol lenisang shimba sülen metetdaktsü.
“Interpol-i inyakyim aser tasa tajung amshiba ajanga tanü tashi nung alima jenjang nung police maparen takok ngua inyaka lir. Tarutsü anogotem nunga Interpol-i alima melenshiba den sütepa, tapet inyakyim aser tasa balala amshia, alima kümzüka ayutsü alizüng lir,” ta pai shisem.
Meng-i taoba küm 4 tashi Interpol lenisang menden abensang, France nunger Mireille Ballestrazzi melenzüka, tanü nungi tenzüka, Interpol lenisang menden aben tenzüktsü.