China mitkar züngsem lakh 3 agi tajemba kümdaktsütsü: Xi

China-i Beijing nung ayongba Asia nung World War II tongpang tembanger küm 70 abensaba bilemtetba sentong nung shilem agia, Pterodactyl I ta ajaba nisung memeni yimdaktsüba tayimtsü abenba mitkar garitemi Tiananmen Gate ajanga aoba noksa nung angur. (Beijing, September 03)

 Beijing, September 03 (Agencies): China mitkar züngsem 300,000 agi tajemba kümdaktsütsü lemtetba osang ka China Tir, Xi Jinping-i tanü Brehostibar nü metetdaktsüogo.

“Mitkar züngsem mesütsüren nung senotsü jenti laluba den külemi, tanü putu nung technology kanga sashia ainba ajanga tongpang nung amshitsü osettsüset benshitsü asoshi taoba mapang nungi nübo kanga agi tejemba nungdaka akümba yong ozü People’s Liberation Army (PLA) züngsem lakh 3 agi tajemba akümtsü lemtetogo,” ta Xi-i ashi.

Japan-i bendanga agütsüba ajanga World War II (WWII) tongpang tembanger küm 70 abensaba bilemteta tanü Beijing yimti nung ayongba mitkar parade sentong nung o jembidang Xi-i iba olenji sangoktsü.

“Tongpang raraba lendong ajuruba sülen ang meimchir asoshi yimji yimjung tiaji tali sentiba akümer. China-i tashiyim agi tanga linük ka danga ajemrepa ayutsü tebilemba mali aser tesüiba mapang WWII nung ajurushiba ama, shinga nema timtem toushi tia bener arutsütsü tangatetba yua mali,” ta pai ashi.

Tan agiba mitkar sentong nung mitkar züngsem 12,000 shi mitkari ketdang asüba tongpang osettsüset 500 aser tayimtsü tapu 200 dak tema amshia shilem agiba osang jangjaogo.

China indang yimsüsütsü tashi benokba Communist Party-i küm 70 tejaklen tongti shilem agiba ajanga Japan-i WWII nung peisasa bendanga agütsütsüa tia bener arutsü ta alima nem metetdaktsütsü aser tang par mitkar tashi sayutsü nükjidong nung tanü sentongji ayonga agiba osang angazükogo.

Ajisüaka, “Tan sentongji Japan anemba sentong lir,” ta züngoka, democracy yimsüsütsü yimya benshiba linük timbakati tanü sentong nung shilem magiba osang jangjaogo.

US-ia par China ambassador iba sentong nung tetendanger ka ama shilem agidaktsüba osang bushitetogo.