China mitkartemi kiralongrar 28 shi tepset

Beijing, November 20 (Agencies): China mitkartemi mepetmesü agi asüngba Xinjiang region nung kiralongrar aser telungpur mita amakba sentong hopta ka shi agiba sülen kiralongrar 28 shi tepsetba osang ka tanü Hokolbar nü metetdaktsüogo.

Kiralongrartemi Xinjiang region kübok Aksu prefecture nung tentetba mijang tutetdak police ketdangser 5 densema, nisung 16 shi taküm September ita tepsetba kepzüka tan mitkartemi kiralongrartem mita amaker lir.

Iba lendongji atalokdaktsüba sülen nübur 10,000 shi yarisemba mitkar aser police ketdangsertemi anogo 56 shi agia kiralongrartemji arishi saka parnok kiralongrartemi memenepi jendaktsü.

“Tan agiba sentong nung mitkartemi kiralongrar ka taküm apuba osanga jangjaogo,” ta Xinjiang regional sorkar ketdangser kati osang jangjashitsü.

Turkic oshi jembir Uighur nüburtem alidak, Xinjiang nung bendang linüktemi nungitba kiralongrar aser sorkar anemertem tesep kanga junga tentetba aliba osang ka ketdangsersangisa metetdaktsüogo.

Taküm September ita atalokba amakba lendongji densema, Xinjiang region nung atalokba lendong den sentakba osang ajunga Beijing-i mimbanga ayuba osanga bushiteta lir.

“September ita atalokba lendong nung ishikba agi nisung 50 shi asüba osang bushitetogo,” ta US sorkari nungitba Radio Free Asia osangia metetdaktsüogo.