China mitkartemi tongpang akoktsü ajungshir: Xi

Beijing nung agiba mitkar sentong ka nung China Tir, Xi Jinping (Achijilen, tejaklen)-i People’s Liberation Army (PLA) lenirtem den ajurutepdang agiba noksa ka yangi angur. (Beijing, July 30)

Beijing, July 30 (Agencies): China mitkartemi tongpang akoktsü tajungshiba olen ka China Tir, Xi Jinping-i tanü, Honibar nü metetdaktsüogo.
Kidangsüa aliba linüktem den South China Sea (SCS) mangatettep ken o adoka tongpanga raratsüsa tensa ajuruba mapang ka nung China mitkartemi par tongpang raratsü terenemshiba tajungba agitsü aser tongpang mashika akoktsüsa renemshia alitsü tayongzükba olen ka Xi-i metetdaktsü.
Züngsem nisung million 2.3 shi densemba  China’er People’s Liberation Army (PLA) mitkar tenteter asüng, Deobar nü küm 89 abensatsü.
Xi-i küm 4 tejaklen nungi tenzüka, alima ajunga nung mitkar telok tulutiba, PLA tajungba küma yanglushiba osanga bushitetogo.
Philippines linüki benokba ken o angadangba sülen United Nations (UN) kübok Court of Arbitration okadaki mangatettep adokba SCS tzüyim tesem ajunga par meyong ta züngshitsü temeten China-i ngua mali ta shia, tawa o bendang agütsü saka China-i UN okadaki agütsüba o bendang magizüktsü lemtetba ajanga kidangsüa aliba linüktem jashidakja lir.
Taoba mapang ama meinyaki Xi-i 2013 küm China lenisütsü menden benokba sülen mitkartem pai aniba Communist Party of China (CPC) kübok aitdaktsü aser tanübo PLA mitkartem asoshi küm nung dollar sen billion 145 tashi endokba osang bushiteta lir.
PLA mitkar jenjang tajungba kümdaktsütsü mapatong tenzükba sülen ochimashi inyakba ken o nung ajemdaker tongti PLA mitkar lenir nisung 40 dak tema anema ken o tang benoka lir.
Ozüng alema süpokrem sen agiba ken o nung aitsüba sülen China nung tentetba okadak kati taoba mitkar lenisang, Guo Boxiong nem taküm tepiyong tepuokdak puoka ayutsü temerenshi tan July ita 25 nü agütsüba osanga jangjaogo.