China nung 1 buba Zika Virus putetogo

Beijing, February 10 (Agencies): China nung Zika Virus menazükba nisung ka putetba osang ka China sorkari ketdang asüba Xinhua osangi metetdaktsüogo.

“Tawa Venezuela linük nungi Jiangxi province kübok Ganxian county tonga aoba arishi küm 34 tain China nunger ka dak Zika mesen keta aliba osang bushitetogo,” ta China’er National Health & Family Planning Commission (NHFPC)-ia osang jangshitsü.

Iba nisungbaji tan February ita 6 nü nungi tenzüka tanü tashi mozükidang tangar shinga dena majurutepdaktsüi tendanga ayuba osanga par tenteti metetdaktsü.

Taoba January ita 28 nü Venezuela tonga aoba sülen iba nisungbai tekolak menüba aser mangmangba densema, imra agi atong ama timatemba sülen taoba hopta China-i tanaben shilangba osang jangjaogo.

Zika mesen den sentakba tashidak agi shirangertemi temang metaba, temang nung komo adokba, tekolak menüba, tenük shia merema akümba aser temang ashiba timtem ajurur.

Iba tashidak agi atonger nisung timba kati timtem tulubo majurur saka mashisa alir tetsürtem asoshibo iba tashidak ka lendong aketba tashidak akümer kechiyong iba meseni tepok nung aliba tanur tekolak temang den meputepi uludaktsüba den külemi, tekolok meshidaki kümdakja microcephaly ta ajaba timtem bener arutsütsü akok ta mozü mongintemi bushiteta lir.

Ano külen, Australia kübok Queensland nunga bendanglen semdangba mashisa alir tetsür ka dak Zika virus keta aliba osang bushitetba osang ka Queensland Health Deparment-ia tanü, Bodbar nü metetdaktsüogo.

Ajisüaka, iba tetsürlai bendanglen nungi Zika virus-ji menazük ta ashiba dak alaka, tetsürlai koba linük semdang iba osangbo memetetdaktsüi lir.

El Salvador semdangba sülen Queensland nungsa alir tetsür tanga ka dak Zika virus aketba osang taoba hopta bushiteta liasü.

North aser South America na nung tan kanga sashia poktetshitsü tenzükba sülen alima ajungai Zika virus den sentakba tashidak aneptsütsü mozü mora bushitsü aser Zika mesen prokshidaktsüba Aedes aegypti merila ajemtsütsü maparen kanga sashia tenzüka lir.