China nung 2 buba Afghan yimjung senden amentsü

Kabul, July 24 (Agencies): Afghanistan sorkar aser Taliban telok nati par tanabuba yimjung senden China nung taruba hopta amentsü akok ta Afghanistan sorkar ketdangser kati tanü Hokolbar nü metetdaktsüogo.

Afghanistan sorkar aser Taliban telok na tsüngda rarabaren par lushi tonga arutsü akok ta temulung malemba yong Afghan sorkar aser Taliban telok na tsüngda yimjung tezüngzüktep agia par rarabaren anentsütsü aoshi China-i tongti shilem agitsü tenzüka lir.

“Ozü Afghan sorkar aser Taliban telok nati tanabuba yimjung senden China kübok Urumqi nung tan July ita 30 nü amentsü sentong renemogo,” ta Afghan High Peace Council nung tongti züngsem, Ismail Qaimyar-i ashi.

Urumqi ya China anülulentip tsütsü Xinjiang region yimtiba lir aser China nung tentetba Islamist telungpurtemi Xinjiang region nung par tesep tenteta lir ta China-i temulung melemi bilemer.

“Xinjiang region nung tentetba Islamist telungpurtemi Afghanistan aser Afghanistan-Pakistan arrtsülen na nung tentetba Taliban telok nem tongpang raratsü terenemshiba sentongtem agitsü asoshi par teseptem amshidaktsür,” ta China-i taoba mapang metetdakja lir.

Afghan sorkar aser Taliban telok nati tan China nung amentsü renemba senden nung United States nungia ketdangsertemi tetendanger ama shilem agitsü renemba osang ka Qasimyar-i metetdaktsü.

Taoba küm 13 tejaklen nungi tenzüka Afghanistan sorkar aser Taliban telok na tsüngda tongpang rarabaren anenja par linük nung yimji yimjung tia bener arutsütsü nükjidong nung Pakistan-i ayonger külen par linük yimtiba, Islamabad nung Afghan sorkar aser Taliban telok na tsüngda 1 buba yimjung senden mendaktsüba osanga bushiteta lir.