China nung Apple company nung inyaketem apu

June 25, 2017 (Agencies): China nunger police-i eastern China Zhejiang Province nung iPhone amshirtem indang jurila osang agizüka ayokba atema Apple contractor company ka nungi parnok 16 puogo
January ita Cangnan county Zhejiang Province nung police-i Apple contractor ka aser Apple oset lemshiba company ka nung inyaker aser inyaka alirtem parnok ishika dak Apple phone amshirtem indang data auyazüka ayokba atema temolung melemi liasü, ta linük nung procuratorate-i ashi.
May ita police-i parnok 22 pua liasü aser parnok rongnungi 20 bo Guangdong, Jiangsu aser Fujian provinces nung company 2 nung inyakertem liasü, ta osang ka ajanga metetdaktsü.
Tang tashi nung iba ken o nung nisung 16 pua lir aser parnok 4 tang bushisüngdangdar.
Pua alirtem rongnungi parnok 15 Guangzhou Telecom Yingke Company nung inyaker. Iba company yagi Apple atema consulting aser after-sales service agütsür.
Prosecutor temi ashiba agi, 2013 August ita nungi tenzüka temolungmelimi bilemer rongnung tongti Yang, Li aser Gan nungeri iPhone amshirtem indang jurila osang reprangtsü asoshi ozüng alema parnok indang internal system amshia liasü. Parnoki ozüng alema nisung tenüngtem, telephone number, email accounts aser Apple customer tem indang address agizük.
July, 2014 küm parnok company-i mapa nungi anentsü, saka company nung mapa inyakertem den longjemer parnoki maneni 2016 August tashi item osangtem auyaa liasü.
Osang shia sen yuan 10 nungi 180 (USD 26.24) tsüngda nung parnoki ayok.
Bushisüngdang ajanga ngutetba agi, parnoki sen yuan million 50 (USD 7.35 million) shi ajangtet liasü.