China nung Apple tematiba jenjang metongdaktsütsü asoshi Huawei-i nokdanger

Beijing, October 2 (Agencies) : Apple-i China nung parnoki yanglutetba smartphone kanga ayoktsü meranger, ajisüaka tia makai linük nung nüburtemi iPhone danga pei linük nung yangluba iPhone ang tenükshiba aser parnoki Huawei kanga sapur, ta Hombarnü bushisüngdang ka ajanga ashi.
Financial Times-i, nüburtemi Huawei taginüba, noklang nung shilem 31.4-i iba brand ya aginer, ta bushisüngdang ka ajanga ngutetba metetdaktsü.
“Taruba mapang nungbo iPhone ang alitsü ta ashirtem September ita nung noklang nung shilem 24.2 ang kümogo. 2016 küm mezüng iPhone 7 sayaba mapang nungbo iba phone alitüper noklang nung shilem 25.8 liasü aser 2015 kümbo ano noklang nung shilem 31.4 liasü,” ta kasa osang ajangasa ashi.
China nung smartphone yanglur Huawei-i taküm mezüngsüa June aser July ita tem nung Apple ajateta alima nung smartphone ayokba otsü nung atonga tematiba jenjang tongteta liasü.
Counterpoint Research ajanga tang tesüsa July 2017 atema Market Pulse bushidangba nung, alima ajak senteper China company ya tang South Korea nung smartphone yanglur tetsüti Samsung sülen tanabuba jenjang nung lir.
Iba takok tulu ya Huawei-i R&D aser oset yanglutsü asoshi sen mesasai inokba aser sales inyakyim kanga sashia, tashi ita aser tuluba küma anir aoba ajanga lir.
Huawei, Oppo, Vivo aser Xiaomi smartphone tem ajanga kanga takok ngua tongtibang supply partner ngutetogo, ibaji ajanga parnoki bezel maliba, full displays, Augmented Reality, in-house chipsets aser advanced camera features keta aliba smartphone tem yanglua sayateter.
Associate Director, Tarun Pathak-i, China nung yangluba phone tem aienbaji kanga tongtibang aser kecha tongtibang temelenshi agia ibaji odang repranga metoktsütettsü. China brand tem kanga kara ainer aser ibaji atema smartphone design, yangluba yimya aser feature aika aliba dang masü saka parnok den toktepertem dang nungi tajungba yangluteta aser parnok dang tajungba yoktetba sentonglenla ajungba ajanga lir,” ta tawa to metetdaktsü.
FT osang ajanga ashiba agi, iPhone 8 agier ajema akümbaji Apple oset aginertemi super-premium iPhone X ataba ajanga lir.
Bushisüngdang ajanga ashiba agi, Apple indang smartphone models tasentem, iPhone 8 aser iPhone 8 Plus na ya kodang taoba mapang China nung sayaba phone tem den medemdangdir tang tamajungba lir.
“iPhone alitsü sentong alir noklang nung shilem 75.7-i iPhone 7 models ana rongnung ka alitsü ta shia liasü saka tangbo noklang nung shilem 65.1-i iPhone 8, 8 Plus mesüra X alitsü jembir,” ta bushisüngdang ajanga ngutet.
Chine nung Apple alir ajema akümbaji ano sen dalang indang smartphone tem agi market sünga akümba ajanga lir, ta kasa osang ajanga ashi.