China nung Bus ka nung mi jangru

Beijing, Metsüremi/March 23 (Agencies): Central China nung raliwalirtem (tourist) mener senzüba bus ka nung mi adokba sülen nisung 26 asü aser 30 yiruogo, ta local ketdangser sangdong ajanga metetdaktsü.
Hokolbarnü bus ka nung nisung 56; passenger 53, bus driver ana aser tour guide ka mener Hunan province ajanga oya aliba mapang gari nung mi adok, ta kasa sangdong ajanga metetdaktsü.
Yirur alirtem rongnung parnok pongu temang kanga mejungi lir aser parnok temang anepalutsü atema mozüki-i anirogo.
Gari anisang ana ya sota lir aser lendong atalokba dak sendakba nung ken o bushitsüngdangdar, ta Changde yimti official social media account nung metetdaktsü.
China nung gari lendong ya kanga bulua ataloker, kong transport authority-i safety regulations junga mebenokteter.
2015 küm gari lendong nung nisung 58,000 shi süogo.
Kasa küm gari lendong atlokba shilem 90 bo traffic ozüng raksaba ajanga liasü.
Taoba küm November ita Chongqing municipality kübok bus ka apu ka tsükpoker aluba sülen nisung 13 tashi süogo. Iba lendong ya passenger ka aser driver na gari todak nung teka sangshia raratepba sülen atalok. Passenger ya, la anentsüba tesem shidak nung manentsüba atema mangatettep adok.
Search aser rescue team-i rong 70 dak tema yok aser tzü telungi airtem telok kati tzü telung nung amshiba robot amshia tzü telung nungi tasümang agitet.
February ita nunga Shanghai nung pressurised gas tanks aser bottle nung petrol bener oya aliba gari ka nung mi jangru aser yimtong nung senzüa alirtem dak oa atsük. Iba lendong nung nisung 18 yirua liasü.