China nung India nunger pongu apu

Beijing, September 13 (Agencies): Kaketshir ka densema India nunger nisung pongu-i hashish seret 27 China telungi shibelentsü merangdang Kunming city nung puogo; parnok nem temerenshi tulu agütsütsüa akok.
India nungertemji Kolkata, Kidderpore tesem nung alirtem lir aser taoba hopta ana tsüngda ken o balala ana nung parnok Kunming airport nung puogo. Mezüngbuba tatalokba nung temesepba mozütemji ‘bhujia’ chiyungtsü taseptsü nung miima bena liasü, aser tanabuba nung kasa temesepba mozütemji tilala küma lensar laptop yangkhu ‘foam’ telung nung miima bena liasü.
Ajisüaka teburtem jagibo parnoki kecha tai meinyak, aser mozü bena alibaji parnoki memeteti liasü, ta ashi.
Mozü shibelenba ya China nungbo ozüng alema inyakba ken o tulu lir. Yaküm China’er Supreme People’s Court (SPC)-i, temesepba mozü ken o tulu nungbo tasüba temerenshi agutsütsü, ta shiogo.
Chinese customs ketdangsertemi August 26 nü Kolkata nungi nisung ana apu aser tena ket nungi mozü seret 9 apu. Iba sülen September 6 nüa Kolkata nungisa tebur asem apu.
Par ponguji arishi küm 22 nungi 46 tsüngdapurtem lir, aser parnok Shenzhen-i aodang pudaktsü. Parnok rongnung kabo Kolkata nung aliba Syama Prasad College nung tezüngdak lir. Parnok rongnung katibo China aiben semdangogo.
China nunger ozüng kübok, mozü shibelenba ken o nung aibelenertem pei aibelen tulu-tila apir küm 15 tashi tepoukdak ayutsüa akok, taküm piyong ayutsüa akok mesüra tasüba temerenshi agütsütsüa akok.