China nung ki chirepa nisung 11 asü

Beijing, July 5 (Agencies): China anüdoklen tesemlen tsüngsem yangluba factory ka chirepa nisung 11 asü aser yangji inyaker nisung 42 tashi kümzüka mozü kidang yaridar, ta Deobar nü osangbenertemi metetdaktsü.
Honibar nikongdang Wenling, Zhejiang province nung aliba, iba tsüngsem yangluba ki chirepdang telung nung mapa inyaker ajak agi nisung 51 liasü, ta China meyong official osang Xinhua news agency ajanga metetdaktsü.
Osanga ajanga ashiba agi, nisung ajak agi parnok 42 tashi iba ki chirepba telung nungi atsütetogo saka parnok koma lir iba indang osang tejangja ano mashi.
Iba ki koma ser achi ibaji bushisüngdangtsü maparen tenzükogo, ta Xinhua osang ajanga ashi.
China nung ki aser factory chirepba ya tang tasen masü kechiba süra ki aser factory aika kanga tejen lir. Linük kanga takar süaka iba amala ki yanglushiba nung sen peria mamshir.
May ita nunga ‘Nursing Home’ ka nung mi lendong adoka nisung 38 asübaji, ki junga anepalua meyaluba agi, ta China nung safety watchdog ajanga ashi.
April ita nunga China nunger ‘Chemical Plant’ ka nung mi adokba ajanga nisung 30,000 tashi iba tesem toktsütsüsa aküm aser iba mi ya ghonda 50 tashi meremsepteti jangrua liasü.
Aser yaküm November ita nunga China aüdoklentip len mejang atuba tesem ka nung mi adoka nisung 26 asü.