China nung küm 30 tashi tanur asoba azüoktsü

Beijing, January 11 (Agcncies): China nung kibong shia tanur asoba yimya atakteta yutsüba ajanga linük nung nüngdakba nübu kanga ajema akümer ta ashiba magizüki, China nung ketdangser tejen kati, China nung ‘family planning’ inyakyim ano küm 30 tashi kanga tashi ita benshitsü, ta Hombarnü metetdaktsü.

Tesüiba küm tang China nung yimsü tesüdak, Chinese Communist Party-i linük nung kibong shia tanur kaka dang asotsü ozüng aliba ageina kibong shia tanur anana asotsü temelaba agüja liasü.

Ajisüaka teshisadangertemi iba temelenshi kanga menur ang arur kechiba süra mezüng aliba ozüng ajanga China nung neüsüng yongsük tsütsü kanga liromemedemi tebilemtsü tulu kümadokogo aser tsüraburtemi tanur kaka dang agibar joko tanur aika maginer, ta ashi.

2050 tashi nung China nütsüng yongsük billion 1.45 akümtsü aser idangji nisung asem nung kabo arishi küm 60 tain asütsü aser ibaji ajanga mapa inyaktsüpur ajema akümba sayur.

Tebilemtsü tulu liaka, China nung ketdangsertemi ‘family planning’ inyakyim ano mapang talangka benshitsü, ta National Health & Family Planning Commission nung Tatong Kilonser Wang Pei`an-i osangbenertem senden ka nung metetdaktsü.

“Mapang talangka ta kodang südir küm 20 nungi 30 tashi asütsü,” ta Wang-i ashi.

“Mapang tatsüka lir külen linük nütsüng yongsük tsütsü temelenshi den socio-economic terenlok aruba mapang nütsüng yongsük inyakyim balaka benoktsü,” ta pai ashi.

Pai, nütsüng yoksüng azüokba maparen ya mapang kobika atema’er ashitsü makok kechiba süra iba ya anentsüji mapangiang ashitsü, ta ashi.

Tanur anana agitsü ozüng ajanga nisung ka kanga tain makün dang takar akümba nung tebilemtsü adoktsü südi ta asüngdangdang, Wang-i, “nütsüng tain akümbaji shingaia mepaidoktetba alima yimya ka lir, ta langzüa liasü.

China tebilemtsü tulutibaji mapa inyaker ajema akümba masü, ajisüaka mapa shitak inyakteter adokdaktsütsübaji lir,” ta Wang-isa ashi.

Pai ashiba agi, linük tesem balala nung tanur asoba tsütsü tebendang tuluka lir kechiba süra yimtsüngtem nung tanur asoba dang nungia yimtitem nung tajemba asor. Yimti nung alirtemi tanur agitsü kangbo jangra mali.

Linük nung nütsüng yongsük ajemdaktsütsü asoshi kibong nung tanur kaka dang asotsü ta asüba ozüng ya 1970s mapang nungi amshitsü tenzüka liasü.

Iba inyakyim ajanga linük nung lanurtem dang nungi tantsür aser tabur timba kümogo.

Tang tanur anana agitsü metetdaktsüba sülen china nung mapang inyakertem 2050 tashi nung nisung million 30 akümtsü aser 2030 tashi nung tantsür tambur shilem 2 agi tajemba akümtsü, ta Wang-i ashi.