China nung pokshiba lendong tulu atalok: 50 asü, 700 dak tema yiru

China northeat tsütsü tzüyimkümlen, Tianjin yimti nung pokshiba lendong tesashi ana tashi atalokdang arongba car gari ka noksa nung angur. (Tianjin, August 13)

 Tianjin, August 13 (Agencies): China northeast tsütsü tzüyimkümlen tentetba Tianjin yimti nung pokshiba lendong ana tashi yasüng, Bodbar aonung atalokba osang jangjaogo ta ketdangsertemi metetdaktsü.

Miim aketba chemical aser gas balala ayudak atalokba lendong nung firefighter ketdangser 12 densema ishiba agi nisung 50 asüba aser nisung 700 dak tema yiruba osang tang tashi nung jangjaogo ta ketdangsersangi ashi.

“Tan yirur 700 rong nung parnok 71 shi kanga mejungi yirua lir,” ta Tianjin sorkaria par Weibo microblog ajanga metetdaktsü.

Yasüng atalokba pokshibarenji anünglak yimzüdaktsüba satellite nungia jangja jangja anguba den külemi, lendong atalokdak nungi kilometer aika pilar alirtemia lendongji pie kimalen ataloker ama pokshiba ola tulu angashiba osang jangjaogo.

Alima ajunga nung tzüyimkümlen tentetba yimti tulu tarensen nung 10 buba, Tianjin nung pokshiba lendong atalokdakdang osettsüet ayudak, gari tasen noklang aika aser lendong atalokdak aliba ki o jen jenti poksaja rongdokba osang jangjaogo ta China sorkari ketdang asüba Xinhua osangia metetdaktsü.

Tan lendongji kechi timtem ajanga atalok iba osang tang tashi mejangjateti lir saka kasaji tekaraba mapang nung jangjatsü asoshi ketdangsertemi bushisüngdang maparen tenzüka lir ta osangi ashi.

“Tanü nikongtsütsü tashi nung firefighter ketdangser 18 tashi samar bushiba aser parnok 66 tashi yirua mozükidang anepaluba osang jangjaogo,”ta Tianjin fire ketdangsertemi metetdaktsü.

Tan pokshiba lendong atalokba sülen jangrutsü tenzükba mi remseptsütsü asoshi firefighter ketdangser 1000 dak temai fire engine 140 shi amshia kanga meranga teinyakdak lir ta Xinhua osangi shisem.

“Tan lendong ajurushir ajunga taküm kümzüka anitettsü asoshi ketdangsertemi bendanga agüja inyaktsüba den külemi, yirua alirtem nem nungdakba taneptsü mapang shitak nung agütsütsüla,” ta China Tir, Xi Jinping-ia tanü metetdaktsü.

Ano, nungdakba bushisüngdang kanga junga agir külen tan lendong atalokdaktsüsüa aibelenertem nem ozüngi melaba ama tapet temerenshi agütsütsü tetuyuba ka pai agüja liasü.