China nung rabitsür ka tepuokdak ayutsü obendang agütsü

Beijing, November 22 (Agencies): China anüdoklen tanur kati homework meinyakmaba ajanga rabitsür kati pa dak kanga mejungi azükba ajanga China court ka ajanga la ita trok tepuokdak ayutsü obendang agütsüogo.
Ozüngmeteter mongintemi ashiba agi, China nung tanur azüoktsü asoshi shi nung kanga merenshir. (physical punishment)
Nanjing, China nung iba tanubusang teperem nung azükba tarak aliba noksa ka internet ajanga belenshiba sülen taküm April ita nung ken o benok.
Nanjing yimti nung aliba police temi iba rabitsür, Li, pua ayu aser iba tanur, arishi küm 9-i homework meinyak ser nung inyakogo ta tiyazü jembiba ajanga pa dak ‘skipping rope’ aser ‘back scratcher’ agi azükba lai nangzük.
Iba tanur ya Anhui Province nung yimtak lir kibong ka nungi lir, ta osang ajanga ashi.
Pa kaket shisatsü tajung ngudaktsütsü meji nung Li nem reprangdakja liasü, ta Xinhua news agency ajanga metetdaktsü.
Medical report ka ajanga tanubusang dak “minor injury” lir ta putetba sülen Li tepuokdak ayutsü obendang September ita agüja liasü.
Tanubusang aser tetsü chijiba naprongi Li dang tai tokang ta temepishiba agütsü. Par tsüraburtemi, Li-i jabaso kanga meimer ajisaüka tan tim masüba agi merenshi, ta ashi.
Ni tetsü tamajung masü saka ni ozü tanur azüoktsü merangerba dang lir, ta Li-i okadak shia liasü.
Lai aibelenba asoshi taitok meshi aser la tai mali, ta laisa shisem.
Nai kechi koda taitok meshiaka tanur yirutsüsa azükba ajanga na ai’er, ta obendangertemi la dang ashi.
Tang ozü jabaso kü ket nung lir ajisüaka ozü sensakba ajanga tanur tarutsü asoshi kanga shisa bulur, ta tetsüi ashi.