China nung rüjep sashia alar, nüburtem okronger

Beijing, Jan 27 (Agencies) : Tanü Honibarnü China lima tesem balala nung rüjep kanga sashia alaba ajanga gari lenmang, train aser tayimtsü aika shibanga ayu; ano linük anüolen tsütsü Vietnam o Uzbekistan na football asayamong ka nung final asayadanga timtem ajuru, ta osang ka ajanga metetdaktsü.
Xinhua news agency ajanga ashiba agi, rüjep alaba ajanga Central Hubei province nung highways section 30 dak tema shibanga ayu aser iba gari lenmangji ajanga gari mejajadaktsü.
Hubei provincial capital Wuhan kübok railway station asem nunga train trip 100 dang tema mejajadaktsüi thinena ayu.
Wuhan Tianhe International Airport nunga tayimtsü 95 mejajadaktsü anungji passenger 1,200 shiji pei aotsüba tesemi moteti lir ta angazüker.
Guangxi Zhuang Autonomous Region yimtiba Nanning nunga tayimtsü anendak nungi jajaba tayimtsü 30 thinena ayu. Honibar nikongdang Jiangsu province kübok Changzhou city nung Under-23 Asian Cup final asayaba mapang asayaba moapu nung rüjep alaba ajanga ghonda ka shi asayaji anena liasü.
Osang ajanga ashiba agi, maneni aruya aliba hopta tashi rüjep alaba ajanga nüburtem tim atemtsü südi ta bilemdar.