China nung tatar senden tenzüker; Xi-i maongka angutsü

Beijing, Metsüremi 03 (Agencies) : Sentong kanga junga renemer külen tanü Küptoknü nungi tenzüka China nung tatar senden amentsü tenzükogo aser iba senden alidang linük temzüng ka yanglushia Tir Xi Jinping iba menden nung mapang kecha talatet kamakai dang amentsüsa maongka agüja Tir kümsük anabenren dang inyaktsü aliba ozüngji agientsü ta bilemdagi.
Kümshi agiba Parliament season koba nung Chinese People’s Political Consultative Conference (CPPCC) aser ozüng yanglurtem, National People’s Congress (NPC) nungi teshimtetpur parnok meyi pongu shii adenshir ruling Communist Party of China (CPC)-i yangluba onükji lemtepa jembitsü.
Tanga ken o tem liakasa tongtibangtibaji CPC ajanga benokba linük temzüng yanglushitsü indangji jembitsü. Linük nung Tir aser Tadong Tir na anabenren tashi dang inyaktettsü ozüng yanglua alibaji agientsü atema parnoki (CPC) benoka lir.
Iba ken o renema aliba anema linük nung alirtem dang masü saka bendang linüktemia tsüremseta bilemba metetdaktsüogo kechiaser Xi ya linük Tir dang masü saka CPC lenir tekolakba aser sepai tanishir naprong repsema bena lir.
Tawatoang anabenren buba pai yimsü asütsü tenzükogo saka temzüngji yanglushira asembenren dang masü ano iba dangji talangba inyaktettsü atema pai maongka angutsü.
China lima nung melangmapu tulu adokba mapang CPC tenzüksang, Mao Zedong-iang tashi tulu amer yimsü süa liasü aser XI-ia iba mesükba maongkaji angutsü ta bilemdagi.