China nunger arishi küm 92 tain actress Li Li-hua süogo

March 21, 2017 (Agencies): Hollywood film nung China nunger mezüng shilem agir, Li Li-hua March 19 nü Hong Kong nung süogo. La arishi küm 92 liasü.
Li Li-hua-i 1940 küm ‘Three Smiles’ film nung mezüng shilem agi aser la-i film nung shilem agiba ya 1978 küm anen. Lai film 120 dak tali nung shilem agia lir. Lai Hong Kong nung aliba Shaw Brothers studio den külemi film aika yanglu. ‘Empress Wu’, ‘Storm Over The Yangtze River’, ‘The Legend of Mother Goddess’ aser ‘The Magnificent Concubine’ amala film tem nung lai tongti shilem agia liasü.
Hollywood nung lai 1958 küm ‘China Doll’ film nung tongti shilem agia ajanga la alima ajungai meteta aküm. Iba film nung la ya China nung kinüker ka amai adoker aser lai America nunger tayimtsü anir ka den meimtepa adoker.
La film nung shilem agiba nungi anenba sülen US nung oa ali. 2015 küm ‘The Golden Horse’ aser 2016 küm ‘Hong Kong Film Award’ sentong nung la nem ‘Lifetime achievement’ sempet agütsü.
Lai 1940s nung Zhang Xupu den kibong aküm aser tena balaba sülen director Yan Jun den 1950s nung kibong aküm. Saka 1980 nung Yan Jun asü aser iba sülen la shishilembar, Wu Zhongyi den la arishi küm 80 nung kibong aküm. Wu Zhongyi ya 2006 küm asü.