China nunger diplomats ana Philippines nung kahset

Manila, October 21 (Agencies): Bodhbar nü Cebu, Philippines nung aliba restaurant ka nung nisung kari injang agi akahdang, China nunger tanga linüktem den tesendaktep tajung asoshi inyaker (diplomats) ana kahset aser ka yirutsü, ta police-i ashi.

Cebu nung China nunger deputy consul aser finance officer na kahset aser consul general ka yirutsü, ta police otongdar Wilben Mayor-i AFP dang SMS ajanga metetdaktsü.

Iba tatalokba nung China nunger ana pua lir. Tena rongnung ka China diplomat ka kinungbo aser ka embassy nung inyaker tetsür ka liasü, ta Mayor-i ashi.

Pai, “Police-i lendong atalokba tesem nungi semi-automatic .45 Colt pistol ka ngutetogo. Iba lendong ya Cebu yimti nung Philippines nunger chiyungtsü anguba, kanga dang nüngtugu restaurant ka nung nikongdang 1:30 ako (0530 GMT) nung atalok,” ta ashi.

Manila nung aliba China nunger embassy otongdar, Li Lingxiao-i iba tatalokba nung tang tangbo ano kecha meshitettsü, ta ashi.

“Embassy nung iba tatalokba jangjatsü merangdar. Osang jangja meteter külen onoki nenok nem metetdaktsütsü,” ta Li-i AFP dang SMS ajanga ashi.

Philippines foreign ministry otongdar, Charles Jose-ia, iba tatalokba nung tang kecha meshitettsü kechiba süra ketdangsertemi tangang iba tatalokba ya kechi agiar bushisüngdangdar, ta ashi.