China nunger kati Linük Wako mezüngmeshiba atema lungkak ait

Greater Noida, March 28 (Agencies) : Hombar nikongdang Noida Sector 63 nung Oppo mobile company nung mapa inyaker kati nung India linük wako ka shisatsüba sülenmepetmesü tulu ka adoka lir.
Linük wako shisaja mezüngmeshiba atema idakji inyakba India nungertem ain adok aser parnoki kima nung lungkak ait.
Oppo company nung mapa inyaker India nunger den Vishva Hindu Parishad züngsemtemi lungkak ait aser parnoki China nungerji ozüng tesashi agi merenshitsü takhangba agütsü. Iba osang angashili police tesem tonga aru.
“Office nung kinük-kisang ajaklen CCTV enoka lir aser onoki police dang camera footage repranga kuli angutsü shiogo. Linük wako mezüngmeshibaji onoki kodanga magizüktsü” ta lungkak aitertem rongnung Vineet Arya ta ser nisung kati osangbener dang ashi.
Police-i iba tatalokba atema ken o ka benokogo aser iba nung China nungba nem tai tonglokja lir. Pa ya Oppo nung production manager inyaka liasü saka company-i pa mapa nungi anentsüogo.
“Iba ken o atema bushisüngdang südar aser tai tonglokja aliba ama kulitem ngutetra, ozüng tapet agi merenshitsü” ta police ketdangser kati osangbener dang ashi.
Taküm küm tetenzüklen Amazon India nunga India Linük Wako mesükba ‘door mats’ ayok aser iba atema India sensotemi ola adoka liasü.
Iba tatalokba nung External Affairs Minister, Sushma Swaraj tiyongtsü ai aser lai Amazon dang tatok meshitsü aser linük wako mezüngmeshiba oset ajak agientsü tetuyuba agütsü.
Tetuyubaji meinyakra Amazon ketdangser shinga nema Indian visa magütsütsü, ta Swaraj-isa metetdakja liasü.