China nunger Liu Xiaobo süogo

Beijing, July 13 (Agencies): China nung nüburtem temeden aser democracy atema jembia inyaker, Liu Xiaobo süogo. Nobel Peace Prize ngua alisang, arishi küm 61 tain, Liu ya temesen nung cancer tashidak keter north-eastern China nung aliba mozüki ka nung anepalua liasü.
China nung sorkar temzüng anema nokdakba ajanga Liu ya tepuokdak küm 11 ayutsü totuyuba agütsü aser pa temang majungba ajanga tepuokdak nungi taoba ita anitet.
University nung professor inyaka arur nübur temeden asoshi inyaker, Liu ya nisung tamajung, ta sorkar ketdangsertemi tenüng agütsü aser pa arishi talangba tepuokdak dang ali.
Tepuokdak malidanga pa senzüsembong nung tenokdangba agüja pa kinüngtsü, Liu Xia tenaprong ‘house arrest’ nung ayu.
Pa asütsü mapang adongtsü hopta eshika lia Liu indang ken o ya alima ajunga nung kanga sashia jembi.
Anülulen aliba linük aikati Liu ya par linük doktsür tanga linük nung pa temang anepaludaktsütsü temelaba agüjang ta China dang ajungshia aru. Germany aser America nungi tawa Shenyang mozüki nung Liu temang reprang aser pa tanga linüki otettsü, ta shia liasü.
Saka pa kanga shirangba ajanga senzüsembongtsü tasak kümogo, ta China nung aliba doctor temi ashi.
Liu temang nung shilem aikati mapa junga meinyak aser pa taküm kümzüktsü merangaka tamakok alu, ta Shenyang legal bureau-i parnok indang website nung sangdong.
China nung democracy busemer rongnung Liu ya tongti shilem agir ka liasü saka sorkar ketdangsertemi pa indang osang kicha temai adoka mesangdongba ajanga nüburtem aikati pa timtemba memeteti lia aru.
Tiananmen nung 1989 küm June ita longkak aitba mapang Liu-i shilem tulu agia liasü aser iba mapang mitkartemi nisung aika tepseta azüdokshi nung anen.
Iba longkak aitertem nisung noklang aika iba azüdokshi nungi kümzüktsü asoshi ketdangsertem den pai anir jembi, aser iba ajanga pai taküm aika kümzük, ta tenüngsang agüja liasü.
Iba sülen pa tepuokdak ayu aser 1991 küm chiok.
Liu Xiaobo-i pa temang reprangdaktsütsü asoshi tanga linüki yokang, ta mepeshia liasü, saka China nung sorkar ketdangsertemi memela.
Nobel Peace Prize angur, Liu taküm aser pa asüba ajanga China nung yimden yimsüsüba nung tashi mait sayur.
Liu nem Nobel Peace Prize ya 2010 küm agütsü aser sorkar temzüng anema nokdakba mechi tepuokdak küm 11 ayutsü totuyba agütsü. Iba sülen Liu kinungtsü-a house arrest nung ayu.
Liu asütsü anogo eshika lia mozüki nung pa kinungtsü den ajurutepdaktsü saka anu tasüba agi piladaktsüogo.
Tiananmen nung longkak aitba mapang apurtem chioktsü asoshi Liu-i sorkar den jembia takhangba agütsüba ajanga pa küm asem tepuokdak ayu saka pa tepuokdak lia 1996 küm Liu Xia den kibong akümtsü mela.