China nunger Nobel Peace Prize angur Liu Xiaobo mang rongdokogo

Beijing, July 15 (Agencies): China nunger Nobel Peace Prize angur aser sorkar anema nokdaker Liu Xiaobo mang tanü Honibarnü rongogo.
Arishi küm 61 tain human rights activist Liu ji tepuokdak lia temesen cancer agi shiranga aruba sülen, taoba Brihostibarnü multiple organ failure ajanga asü.
China kübok Shenyang city nung Liu’er kinungertemi pa den asüpila sentongji agi, ta ketdangser kati ashi.
Liu indang mangji par kinungertemi aginüba ama aser sobaliba yimya nung arong, ta Shenyang nung information office atema otongdar Zhang Qingyang-i metetdaktsü.
“Liu kinungtsü Liu Xia aser tenu Liu Xiaoguang na dena kinungertemi pa den asüpila sentong ka agir, pa mang arongtsü lemtet, saka mitsüji kong ayutsü mesüra endoktsü telemtetba magi lir” ta Qingyang-isa ashi.
China sorkari Liu indang mapa aser pa tenüng nokdanga lir aser maneni parnoki pa asüba osang, pa mang ayimba osang aser online nung pa tenüng mesüra jembiba olentem bushiba ajak nokdanger.
China nung media ajak Communist Party ajanga ketdang asür aser parnoki Liu indang osang kecha mejembir.
Liu ya 2009 nung küm 11 atema tepuokdak ayutsü temerenshi agütsü. Linük anema nokdakba ken o nung pa aija liasü aser China sorkarisa pa kinungtsü activist Liu Xia-a house arrest süa lir.
Liu asüba sülen China sorkari pa kinungtsüji tang tashibo talenba kecha mali lir saka lendong nungi jenbua alitsüla ta metetdaktsüogo.
Alima nung lennirtemi Liu Xia dang China toktsür aotsü atema shiyonga arur. La ya artist, poet aser Liu den mapang talangka nungi China nung democracy atema rarayonga arur ka lir.
Liu asüba sülen international community-i China dang Liu Xia-i la kinungbo nem agütsüba Noble Prize agizüktsü atema Norway-i yokang ta takhangba agütsür.