China nunger PG student Ita nung aliba tzümopung mesükba tesem nung alitsü

Beijing, May 13 (Agencies): China nunger Ita nung tua lidaktsütsü nükjitong nung tangazükba balala agitsü asoshi Ita lima nung aliba tzü-mopung den sako aliba laboratory ka nung kaketshir teshiemtet telok ka anogo 200 alitsü.
Beijing nung aliba Astronautics Research University, Beihang nung Postgraduate (PG) kaketshir pezü-i tasazük square metre 160 indang ‘Yuegong-1’ mesüra ‘Lunar Palace’-i Bhodbarnü iogo, ta ketdangser osang ajanga ashi.
Iba mapa inyaktsü pei sasa molungteter kaketshirtem ya iba lab nungi alima den kicha tesendaktep malitsü, ta kasa osang ajanga ashi.
Parnok indang jana ya ‘bio-fermentation process’ ajanga amshitsü aser süngjanglijang aser aonsotsütem iba tesem nung parnoki tendanga tsünüdangtsü.
Taküm kümzüka ayutsü asoshi iba cabin nung aliba oset ya alima nung aliba oset ajak dang advance tasüba lir, ta parnoki ashir.
China nungi astronaut kata Ita lima nung tetsüng majemokdang aser iba mapa inyaktsü anu küm ter-shi agitsü saka tang tenzükba mapa ajanga tanga linüktem nungi Ita nung tua mapang talangba alitsü sendong bushir nem teyari agütsütsü.
Iba lab nung mezüng anogo 60 alitsü asoshi tetsür ana aser tebur ana Bhodbarnü iogo. Iba sülen parnok melena anu tanga telok iba lab telung nung anogo 200 alitsü asoshi ayitsü aser iba sülen mezüng ayir telok ya anogo 105 alitsü asoshi tanaben ayitsü.
Iba ‘Lunar Palace’ nung alu ayimtsü asoshi tesem ana aser nisungtem alitsü asoshi tasazük square metre 42 ajungba cabin ka lir. Iba cabin nung yipden pezü aliba dakdang tila ka, ajak asoshi dakdang ka, tzü agitsü asoshi dakdang ka, jana indokba dakdang ka aser shiruru metsütsü asoshi dakdang ka lir.
“Jana indokba, tzü indokba, rem aser wheat nunger anük-anüka kümdaktsütsü aser chiyongtsü anepaluba amala mapa tem ni inyaktsü aser tanüngba kaketshirtem shia nem tsünüsempongtsü anepalutsü aser temang anema ali-mali reprangtsü mapatem lemzükja lir,” ta kaketshir kati osangbener dang ashi.
Iba ama kasa maparen ya 2014 küm inyak aser iba mapang anogo 105 tashi takok ngua tetendangba balala agia liasü.
Lunar Palace ya alima nung ‘bio-regenerative life-support’ tasembuba lir aser China nung ibai mezüngbuba lir.
“Shiruru, tenük agi angutsü makokba taküm tem, süngtonglitong aser nisung külemi alitsüsa yangluba lab rongnung ibai mezüngbuba alitsü,” ta iba lab design asür, Liu Hong-i osangbener dang ashi.
United States aser Europe den kasa akümtsü asoshi ‘Military-run space programme’ atema China-i sen billion aika indoka maparen balala inyakba mapang ka lir aser 2022 tashi nungbo China nungera Ita-i atutsü sentong lir.
Iba sentong ajanga China-a tanga linük tem den menepteba anünglak nung mapa balala inyaktettsü südi, ta Beijing-i ashir, saka China-i item mapatem ya timba US aser Soviet Union-i küm ter tejaklen inyakba ajizüka amshiba timba lir.