China o Iran nati tesendaktep tajung ayutsü nangzükteper

Iran yimtiba, Tehran kübok Saadabad Palace kimalen agiba pela agizükba sentong nung China Tir, Xi Xinping (Tejaklen, Achiji)-i Iran Tir, Hassan Rouhani den aroki shilem agiba noksa nung angur. (Tehran, January 23)

Dubai, January 23 (Agencies): China aser Iran na tsüngda tesendaktep tajung ayutsü asoshi China Tir, Xi Jinping aser Iran Tir, Hassan Rouhani nati tanü Honibar nü nangzüktepogo.
Alima tashi abenba linüktemi Iran anema benokba tenokdangba sentongtem tan January ita 16 nü agienba sülen Xi ya Iran semdanger mezüngbuba bendang linük lenir akümer lir.
Iran den yaküm 2015 küm nuclear tezüngzüktep agir alima tashi abener linüktem rong nung China-a densemogo.
“Alima tashi abenba linüktemi par tenokdangba sentongtem agienba sülen Tir Xi-i tan Iran semdangba atema kanga pelar. Ozü Iran aser China nati taruba küm 10 tsüngda nung shishilembatsü jenjang dollar sen billion 600 agi timba küma temaba jenjang nung ajungkettsütsü alizüng yuogo,” ta Rouhani-i metetdaktsü.
Akidang amshiba Silk Road shishilembatsü lenmang tanaben amshi tenzüktsü aser nübur yaritsü nuclear energy mapatong amalitepa inyaktsü tezüngzüktep densema, Rouhani aser Xi nati par Iran aser China na tenüng nung tezüngzüktep 17 tashi tanü zülutepa agiba osang jangjaogo.
“Iraq, Syria, Afghanistan aser Yemen nunger nung kiralongrar aser telungpurtemi lendongtsüdong atalokdaktsüba anenja yimji yimjung tensa bener arutsütsü maparen nunga ozü linük anati amalitepa inyaktsü nangzüktepogo,” ta Rouhani-i shisem.
Xi tan Iran semdangba sülen küm 14 tsüngda nung Iran semdanger mezüngbuba China Tir akümer lir.
Tir Xi-i tan January ita 19 nü nungi tenzüka Middle East semdangtsü maparen tenzüka Iran semdangba jakdang Saudi Arabia aser Egypt linük nata semdangba osang jangjaogo.
Xi-i Tir Rouhani den ajurutepba sülen Iran’er Supreme Leader, Ayatollah Ali Khamenei den ajurutepba osanga jangjaogo.