China o Nepal nati shishilembatsü tezüngzüktep agir

Beijing, March 21 (Agencies): China aser Nepal na tsüngda tetsükdakba kechi meli shishilembatsü aser China nungi Nepal tonga train intep yanglutsü tezüngzüktep ka China Ato Kilonser, Li Keqiang aser Nepal Ato Kilonser, Khadga Prasad Sharma Oli nati tanü, Hombar nü agiogo.

Keqiang-i par linük semdangsang, Oli den Beijing kübok Great Hall of the People kilung nung ajurutepa par linük ana tsüngda tesendaktep tajungba küma yanglutsü onük benoka jembiba sülen tanü tezüngzüktepji zülutepa agiba osang jangjaogo.

“Nepal nung tentetba tongtipangtiba yimti 3 ajurutepdaktsütsü train intep ka aser China nungi arrtsü adena Nepal tonga aotsü train intep ka densema, tongti train intep 2 tashi yanglutsü onük Nepal lenir, Oli-i tan senden nung benok,” ta China Foreign Ministry kübok Asia Division nung Deputy Chairman, Hou Yanqi-i osang jangjashitsü.

Paisa ashiba agi, Tibet kübok Shigatse yimti nungi Nepal arrtsülen, Gyirong yimti tonga train intep yanglutsü asoshi China-i par China nung tentetba teloktem nem nunglokja lir.

Keqiang aser Oli nati Nepal kübok Pokhara nung tayimtsü anendak tasen ka yanglutsü aser ali telung nungi totzü tutettsü lenmang bushitsü densema, ajak agi tezüngzüktep 10 tashi tanü zülutepa agiba osang jangjaogo.