China o Norway nati Islamic State kiralongrar telok aitsür

Beijing, November 19 (Agencies): China aser Norway nati Islamic State (IS) kiralongrar telok aitsüba olen ka tanü Brehostibar nü sangoktsüogo.

“Kiralongrabaren ya meimchir ajunga indang arrür lir aser ozü China-i kiralongratsü shilem ajunga anemer. Ozü senso tepseta merenshir kiralongrar ajunga pua parnok nem ozüngi melaba ama tapet temerenshi agütsütsü nangzüker,” ta China Tir, Xi Jinping-i tanü ashi.

China nunger arishi küm 50 tain Fan Jinghui aser Norway nunger arishi küm 48 tain Ole-Johan Grimsgaard-Ofstad na tepseta merenshiba osang ka IS teloki par online magazine, Dabiq ajanga alima dang sangoktsüba sülen China o Norway na lenir anati tanü IS telok aitsüba olenji kanga jashia metetdaktsü.

“Ozü senso tepseta merenshitsü maparenji tamangba yimsü mesüra yimtenren sabangtem nung tajemdakdak maliba maparen ka lir. Ozü senso tepseta merenshiba maparen ya kepzüktsü nangzüker,” ta Norway Ato Kilonser, Erna Solberg-ia tanü metetdaktsü.

Political Philosophy graduate, Grimsgaard-Ofstad-i taküm January ita Syria semdangdang IS teloki pa tashiyim agi apuba osang jangjaogo saka osangkaket balala den osangtem lemsatepsang, Fan-ji IS teloki kong aser kodang tashiyim agi apu iba osangbo tang tashi mejangjateti lir.